Farg‘ona viloyati So‘x tumani “Zangat” MFY hududida sug‘orish tik qudug‘i loyihasi bo‘yicha 2022 yil fevral oyida o‘rnatilgan beton elektr tayanchlar 2 oyga bormasdan qulagan.
Mahallada yashovchi fuqarolarning Kun.uz'ga yuborgan suratlaridan, beton ustunlarning ostki qismi bo‘laklarga bo‘linib ketganini ko‘rish mumkin. Bu esa beton qorishmasining sifatiga nisbatan savollar uyg‘otadi.
“Zangat” MFY Sihatgoh ko‘chasiga 5 oycha oldin transformator olib kelishgan, lekin haligacha o‘rnatilmagan, yerda yotibdi. Bir so‘z bilan aytganda, So‘xda TETK xodimlaridan “Zangat” MFY xalqi norozi”, — deyiladi tahririyatga kelgan murojaatda.
Kun.uz'ning aniqlashicha, hududga temir-beton tayanch o‘rnatish ishlari “Zilxa A” MChJ tomonidan amalga oshirilgan. Tayanchlar So‘x TETK shartnomasi asosida So‘x tumanida ishlab chiqarilgan.
