Chimkentda O‘zbekiston fuqarosi qurol do‘koniga hujum qildi, otishmada qorovul jarohat oldi.
Qozog‘istonning Chimkent shahrida qurollangan shaxs qurol do‘koniga hujum qildi. Bir kishi jarohat oldi, deb xabar berdi Kazinform.
«Bugun soat 14:40 atrofida Ilyayev-Riskulbekov ko‘chalari chorrahasida joylashgan qurol do‘konida favqulodda holat signali chalindi. Voqea joyiga zudlik bilan xavfsizlik agentligi xodimlari yetib bordi. Qo‘riqchilar va qurollangan noma’lum shaxs o‘rtasida otishma sodir bo‘ldi. Oqibatda do‘kon qorovullaridan biri yaralandi», deyiladi xabarda.
Politsiya ma’lumotlariga ko‘ra, qurollangan shaxs huquq-tartibot idoralari xodimlari tomonidan qo‘lga olingan.
Gumon qilinuvchi O‘zbekiston fuqarosi ekani, Chimkentda ijaraga olingan kvartirada yashagani aytilmoqda.
«Undan ov miltig‘i va o‘g‘irlangan Sayga karabini olib qo‘yildi. Hozir voqea joyida tezkor tergov guruhi ishlamoqda. Hodisaning barcha tafsilotlari aniqlanmoqda», deyiladi xabarda.
