Tadbirkorlar va ishbilarmonlar harakati – O‘zbekiston Liberal-demokratik partiyasidan O‘zbekiston Respublikasi Prezidentligiga nomzod Shavkat Mirziyoyev Toshkent shahar saylovchilari bilan uchrashuvda Toshkent shahrida amalga oshirilajak loyihalar haqida gapirdi. Nomzodning uchrashuvdagi nutqi to‘liq holda «Toshkent oqshomi» gazetasida chop etilgan.
Uning ma'lum qilishicha, Toshkent shahrida 4ta ko‘p qavatli avtoturargohlarni qurish ishlari boshlab yuborilgan.
Nomzodning aytishicha, yengil avtomobil haydovchilariga qulaylik yaratish maqsadida shaharning Mirzo Ulug‘bek, Sergeli va Yashnobod tumanlarida 4ta ko‘p qavatli avtoturargohlarni qurish ishlari boshlab yuborildi. Shunday garajlarni barpo etish maqsadida kelgusi 5 yilda yana 84ta loyiha amalga oshiriladi.
Sergeli tumanining "Sergeli-6" mavzesida joylashgan 400ta avtomobilga mo‘ljallangan ko‘p qavatli avtoturargoh qurilishiga jami 7,5 milliard so‘m mablag‘ sarflanib, u 2017 yilda ishga tushiriladi.
Shuningdek, avtobus, metro va boshqa turdagi jamoat transportlarining faoliyatini kengaytirish borasida ham muhim ishlar amalga oshiriladi.
«Kelgusi 5 yilda umumiy qiymati qariyb 390 milliard so‘m bo‘lgan 4ta loyihani amalga oshirish ko‘zda tutilmoqda. Shaharda serqatnov, tirband hududlar bo‘yicha 80ta yangi avtobus yo‘nalishi tashkil etiladi. Har yili katta va o‘rta sig‘imdagi 100ta avtobus xarid qilinadi. Bu maqsadlarga mahalliy byudjyet hisobidan 335 milliard so‘m mablag‘ yo‘naltiriladi», – degan Shavkat Mirziyoyev.
