Nemis olimlarining aniqlashicha, havo ifloslanishi avval o‘ylanganidan ikki barobar ko‘proq o‘lim holatlariga olib kelishi mumkin. Shu bilan birga, odamlar asosan aerozollarning surunkali ta'siri tufayli yuzaga keluvchi yurak-qon tomir kasalliklaridan vafot etishadi. Bu haqda MedicalXpress xabar bermoqda.
Tadqiqotchilar havo ifloslanishi turli manbalarining o‘lim holatlari darajasiga ta'sirini modellashtirishdi. Ma'lum bo‘lishicha, 2015 yilda atrof-muhitning yomon holati butun Yevropa bo‘ylab 790 ming kishi o‘limiga sabab bo‘lgan. Shu bilan birga, bu holatlarning 40-80 foizi yurak-qon tomir kasalliklari, shu jumladan, insult va infarktlar hissasiga to‘g‘ri keldi. Qayd etilishicha, bu nafas olish organlari ishidagi buzilishlar tufayli yuz bergan o‘lim holatlaridan qariyb ikki barobarga ko‘p.
Butun dunyo bo‘ylab ifloslangan havo tufayli vafot etganlar soni yiliga 8,8 million kishini tashkil etadi, bu avvalgi hisob-kitoblarga qaraganda ikki barobar ko‘p. Olimlarning so‘ziga ko‘ra, shu sabab tufayli tamaki chekishdan ham ko‘proq inson hayotdan ko‘z yumadi.
Organizmga zararli ta'sir ko‘rsatadigan asosiy omil havoda 2,5 mikron diametrli qattiq zarrachalar mavjudligidir - PM2.5. Ular yurak-qon tomir va nafas olish kasalliklarining asosiy sababi sanaladi. Yevropada yillik zichlik har bir kub metr uchun 25 mikrogrammni tashkil etadi, bu JSTning bir kub metrga 10 mikrogrammlik darajasidan ikki barobar ko‘p.
