“Darakchi” gazetasida bir necha hafta avvalgi sonida mashhur “Shum bola” filmining suratga olinishi tarixi haqida maqola chop etilgandi.
O‘sha maqolada film ijodkorlari orasida vafot etgan aktyorlar ham yod etilgan, film rejissyori Damir Salimov bergan ma'lumotga asosan, filmda Omon rolini o‘ynagan Saidkarim Saidoripov ham marhumlar qatoriga kiritilgan edi.
“Maqola chop etilgach, tahririyatga Saidkarim Saidoripovning o‘zi qo‘ng‘iroq qilib qolsa deng! “Men “Shum bola”dagi Omonman. Tirikman!”, dedi Saidkarim aka bizni shoshirib”, - deyiladi gazeta xabarida.
Bu xabardan “Shum bola” filmi rejissyori Damir Salimov ham hayratini yashira olmagan. “Ancha ilgari uning vafot etgani haqida eshitgandim. Umri uzoq bo‘larkan”, - dedi rejissyor.
Qayd etishlaricha, Saidkarimov Saidoripov “Shum bola”dan so‘ng boshqa filmlarda rol o‘ynamagan.