O‘zbekiston Fanlar akademiyasi Biorganik kimyo instituti direktori Abbosxon To‘rayev hamda ilmiy xodim Shavkat Shomuratov tomonidan «Biomayrin» nomli sil kasalligiga qarshi kombinatsiyalashgan ta'sirli preparat yaratildi. Bu haqda Fan va texnologiyalarni rivojlantirishni muvofiqlashtirish qo‘mitasi axborot xizmatiga asoslanib, "Telegraf.uz" nashri xabar bergan.
Ushbu dori vositasi kapsula ko‘rinishida bo‘lib, antibakterial ta'sirga ega. Mycobacterium tuberculosis mikobakteriyalarining turli rivojlanish bosqichlarida samarali ta'sir ko‘rsatadi. Preparat tarkibiga kiruvchi faol moddalar kombinatsiyasi monoterapiya vaqtida vujudga keladigan rezistentlik rivojlanishini kamaytiradi.
Hozirgi kunda ushbu preparat yuzasidan klinik sinovlar o‘tkazilib, tibbiyot amaliyotida qo‘llashga kirishilmoqda.
Ma'lumot uchun: «Biomayrin» preparati makromolekulyar dorivor tizimda (MM 12 kDa), modifikatsiyalangan poligalakturon kislotasiga sil kasalligiga qarshi preparatlar izoniazidni (8 foiz) azometin bog‘i vositasida, etambutol (16 foiz) va rifampitsinni (13 foiz) ion bog‘i vositasida biriktirish orqali olingan.