Bugun, 30 iyulda Xalqaro do‘stlik kuni (International Day of Friendship) – taqvimdagi eng yosh bayramlardan biri nishonlanmoqda. Bu kunning nishonlanishi haqidagi qaror BMT Bosh assambleyasining 65-sessiyasida 2011 yil 27 aprelda qabul qilingan.
BMT davlat tuzilmalariga hamda xalqaro va mintaqaviy tashkilotlarga bu kunni u yoki bu davlatning madaniy an'analariga muvofiq ravishda nishonlashni taklif qiladi. BMT rezolyutsiyasida ushbu kunni turli xalqlar orasidagi do‘stlikni mustahkamlashdagi o‘rni alohida ta'kidlab o‘tilgan.
“Xalqlar, davlatlar, madaniyatlar va alohida shaxslar o‘rtasidagi do‘stlik tinchlikni ta'minlashdagi harakatlarga ilhomlantirishi mumkin va madaniy turfalikni hurmat qiladigan jamiyatlar orasida ko‘priklar o‘rnatish imkoniyatini beradi”, deyiladi hujjatda.
Bundan tashqari, ushbu kunning asosiy vazifalaridan biri yoshlarni, shu jumladan, bo‘lg‘usi yetakchilarni turli madaniyatlarni hurmat bilan e'zozlashga qaratilgan jamoatchilik faoliyatiga jalb qilishdan iborat.
Ayni paytda dunyoning turli davlatlarida do‘stlikni targ‘ib qilish bilan bog‘liq turli tadbirlar o‘tkazilib kelinadi.
Turli davrlarning buyuk allomalari do‘stlik haqida dono fikrlarni bildirganlar:
Mark Avreliy: “Qo‘l qo‘lga, oyoq oyoqqa va yuqorigi jag‘ pastki jag‘ga yordam berganidek, insonlar ham bir-biriga yordam berish uchun yaralganlar”.
Volter: “Bu dunyoning barcha izzat-ikromlari bitta yaxshi do‘stga arzimaydi”.
Mark Tven: “Haqiqiy do‘st sen nohaq bo‘lganingda yoningda bo‘ladi. Sen haq bo‘lganingda, sen bilan har kim bo‘lishi mumkin”.