UZ24 tahririyatiga Toshkentdagi “Malika” maishiy texnika va elektronika yarmarkasida (“Fleshka” savdo markazi) do‘konlarning qisman rekonstruksiya qilinishi boshlangani haqida xabar kelib tushdi.
Ayrim do‘kon egalarining aytishlaricha, bir nechta do‘konlar rekonstruksiya qilinmoqda. Bu yerda do‘konlarning buzilishi haqidagi xabarni na rasmiy idoralar va na sotuvchilar tasdiqladilar.
Yil boshida UZ24 portali Toshkent shahri Arxitektura va qurilish bosh boshqarmasidan shahar hokimiyati yarmarkaning boshqa joyga ko‘chirilishi masalasini ko‘rayotgani haqida maktub olgan edi. Savdo majmuasi ko‘chirilishi masalasining ko‘tarilishiga “Malika” oldidagi Kichik avtomobil xalqa yo‘lining tirbandligi va bundan haydovchilar va ushbu hududda yashovchi aholining norozi bo‘layotgani sabab qilib ko‘rsatilgan edi. O‘shanda yarmarka qachon va qayerga ko‘chirilishi ma'lum qilinmagan.