Zarafshonlik tadbirkor Navoiy viloyati sanoatida yangi mahsulot — karbid ishlab chiqarishni yo‘lga qo‘ydi. Koks va ohakdan tayyorlangan bu mahsulot gaz-payvandlash ishlarida keng qo‘llaniladi. Bu haqda "Telegraf.uz" nashri xabar berdi.
"Karbid zavodi qurilishi loyihasi besh yil avval tasdiqlangandi. O‘tgan yil bahorida bank krediti hisobiga qurilish ishlarini boshlab, qisqa muddatda poyoniga yetkazdik. Joriy yilda ilk mahsulotni oldik. Maqsadimiz, mahalliy xomashyodan tayyor mahsulot ishlab chiqarish bo‘lib, koksni Farg‘ona neftni qayta ishlash zavodidan, metallni esa Toshkent shahridan olayapmiz", — deydi tadbirkor S. Adizov.
Ma'lum qilinishicha, yangi ish boshlagan karbid zavodida ayni paytda 22 kishi mehnat qilmoqda. Zavod to‘liq quvvatda ishlay boshlasa, ishchilar safi yanada kengayadi. Zavod mahsulotlarini realizatsiya qilish uchun allaqachon Samarqand va Toshkent viloyatlaridagi sanoatchilar bilan shartnomalar ham imzolangan.