10 avgust kuni O‘zbekiston prezidenti “O‘zbekiston Respublikasining ayrim qonunchilik aktlariga o‘zgartish va qo‘shimchalar kiritish to‘g‘risida”gi qonunni imzoladi. Unga ko‘ra, Ma'muriy javobgarlik to‘g‘risidagi kodeksga, “O‘zbekiston Respublikasi Vazirlar Mahkamasi to‘g‘risida”gi, “Prokuratura to‘g‘risida”gi, “Me'yoriy-huquqiy aktlar to‘g‘risida”gi qonunlarga ham ma'lum o‘zgartishlar kiritildi. Bu haqda "Gazeta.uz" xabar bermoqda.
Qonun parlamentning quyi palatasi tomonidan 29 iyul kuni qabul qilinib, 6 avgust kuni Senat tomonidan ma'qullandi. 11 avgust kuni qonunning OAVda e'lon qilinishi bilan u kuchga kirdi.
O‘zgartishlardan biri maxsus avtomatlashtirilgan foto va video vositalari yordamida qayd qilingan yo‘l harakati qoidalari buzilishi hollari uchun ma'muriy javobgarlikning joriy qilinishi bo‘ldi. Bu haqdagi o‘zgartish kodeksning 17-1 moddasiga kiritildi.
Agar ushbu vositalarda qayd qilingan YTHda ishtirok etgan avtotransport yuridik shaxsga tegishli bo‘lsa, YTH uchun javobgar deb yuridik shaxsning avtotransporti ekspluatatsiyasiga mas'ul shaxs topiladi.