O‘zbekistonning yarmarka va forumlar tashkil qilishdagi faolligi, shuningdek, uning chet eldagi mana shunday tadbirlardagi faolligi ishbilarmon jamoalarning qiziqishini uyg‘otmoqda. Bu haqda Jidda shahri Savdo-sanoat palatasi raisi o‘rinbosari Ziyod Bassom bayonot berdi.
“Jidda shahri Savdo-sanoat palatasi va Saudiya Arabistoni ishbilarmonlari ikki tomonlama savdo-iqtisodiy aloqalarni rivojlantirishga qiziqmoqdalar. Bunda turli sohalardagi aloqalarni mustahkamlash ko‘zda tutilmoqda”, - uning so‘zlarini keltiradi “Jahon” agentligi.
“O‘zbekiston katta iqtisodiy imkoniyatlar mamlakatidir, u tabiiy va mineral resurslarga boydir. Respublika paxta yetishtirish bo‘yicha beshinchi, eksport qilish bo‘yicha to‘rtinchi, oltin va gaz qazib olish bo‘yicha esa yettinchi va sakkizinchi o‘rinda turadi”, - qo‘shimcha qildi Saudiya vakili.