Bir muddatdan buyon yangi biometrik pasportlarni olish muddati uzaytirilgani haqida mishmishlar tarqaldi. Bu holatni aniqlashtirish maqsadida “Darakchi” gazetasi Toshkent shahar IIBB Xorijga chiqish, kelish va fuqarolikni rasmiylashtirish boshqarmasi markaz boshlig‘i, mayor Sanjar Qosimovga murojaat qildi.
Rasmiy shaxs muddat ilgarigidek 2015 yil 15 dekabr ekanligini ta'kidlab o‘tdi.
“...Farmonda belgilangan muddatning uzaytirilishi haqida hozircha hech qanaqa rasmiy hujjat qabul qilinmagan”, - ma'lum qildi u.
“Aholi orasidagi “biometrik pasport olish muddati 2017 yilgacha uzaytirilar ekan”, degan mishmishlar hozircha asossiz. Hali bu borada birorta yangi rasmiy manba qabul qilingani yo‘q”, - qo‘shimcha qildi Qosimov.
Shu bilan birga, u O‘zbekiston fuqarolarining aksariyati yangi biometrik pasportlar bilan ta'minlanganini ta'kidlab o‘tdi.