2015 yilga kelib O‘zbekistonda o‘tkir miokard infarktidan o‘lish darajasini 10 foizga kamaytirish bo‘yicha ko‘rsatkichlarga erishildi, deb xabar berdi “Sputnik Uzbekistan” nashri muxbiriga O‘zbekiston Sog‘liqni saqlash vazirligidagi manba.
Manbaning aytishicha, bunga oxirgi 10 yil ichida mamlakatda kardiologiya xizmati yagona tarmog‘ini yaratish, shoshilinch tibbiy yordam tizimi, amaliyotga tashxislash va davolashning zamonaviy standartlarini bosqichma-bosqich tatbiq qilishga yo‘naltirilgan dasturlarni amalga oshirish doirasida erishildi.
Bundan tashqari, qabul qilingan dasturlar doirasida amaliyotga bolalarga avvalgidek 3 yoshdan emas, balki ularning tug‘ilishidanoq kardiojarrohlik yordami ko‘rsatish tatbiq qilindi. Mos ravishda, bu kasalliklarning oldini olish, tashxislash va erta bosqichda davolashga imkon berdi.
Manbaning aytishicha, bugungi kunda o‘zbek kardiologlari Janubiy Koreya, AQSh, Germaniya, Italiya, Fransiya va boshqa davlatlardagi hamkasblari bilan yaqindan hamkorlik qilmoqdalar. O‘zbek shifokorlari ular ishtirokida operatsiyalar, kardiojarrohlikning dolzarb muammolari bo‘yicha ilmiy anjumanlar o‘tkazib, tajriba almashmoqdalar, ularning eng yaxshi jihatlarini o‘zlashtirmoqdalar.
Bu hamkorlik doirasida mamlakatimiz olimlari yurak-qon tomirlari kasalliklari va bolalarda tug‘ma yurak nuqsonlarini davolashning yangi usullarini o‘zlashtirib oldilar va ulardan amaliyotda samarali foydalanmoqdalar.
Yurak kasalliklarini davolashda yana bir muvaffaqiyatlardan biri tibbiyot muassasalarida jahon standartlariga javob beruvchi zamonaviy uskunalarning mavjudligi hisoblanadi. Bundan tashqari, amaliyotga tashxislash va davolashning yuqori texnologik metodlari joriy qilingan. Misol uchun, Respublika ixtisoslashtirilgan kardiologiya markazida oxirgi 5 yil ichida angiografik qurilma bilan jihozlangan rentgen-endovaskulyar jarrohlik bo‘limi tashkil etilgan.
Ayni paytda markazda koronaroangiografiya usuli – yurak tomirlarining toraygan qismlarini aniqlab, ularga stentlar o‘rnatish amaliyoti o‘tkazilmoqda. Har yili markazda davolashning bu usuli minglab kasallarni davolashda qo‘llanadi. Bu usul evaziga yurakning eng xavfli kasalligi – miokard infarktining avj olishi oldi olinadi.