O‘zbekistonning birinchi raketkasi Denis Istomin AQShning Mayami shahrida davom etayotgan “Masters” seriyasiga kiruvchi, sovrin jamg‘armasi 7 million 37 ming 595 dollardan iborat nufuzli turnirdagi ishtirokini yakunladi.
Denisning ikkinchi bosqichdagi raqibi dunyoning ikkinchi raketkasi britaniyalik Endi Marrey bo‘ldi.
Marrey o‘z ishtirokini to‘g‘ridan-to‘g‘ri ikkinchi davradan boshladi. Bu uchrashuv Toshkent vaqti bilan 27 mart kuni tongi, soat 05.00da boshlandi.
O‘zbekiston vakili 1 soatu 39 daqiqa davom etgan uchrashuvda 3:6 va 5:7 hisoblarida mag‘lubiyatga uchradi.
Endilikda, bu tennischilarning o‘zaro uchrashuvlardagi natijasi britaniyalik tennischi foydasiga 3:0 bo‘lib turibdi.
U keyingi bosqichda bolgariyalik Grigor Dimitrov bilan to‘qnashadi.
Taqqoslash uchun, 29 yoshli Denis Istomin dunyo reytingida 76, 28 yoshli Marrey esa 2-o‘rinni egallab turibdi. Mayami turniri g‘olibi bir million 28 ming 300 dollar mukofot puli hamda 1000 reyting ochkosiga ega bo‘ladi.