Kuni kecha Tokio shahrida chet el elchixonasi xodimlari va chet elliklar o‘rtasida 19-marotaba o‘tkazilgan "Yapon tilida notiqlik san'ati" tanlovining g‘olibiga aylangan o‘zbekistonlik talaba haqida xabar bergan edik. Bugun esa sizlar uchun ushbu iqtidorli hamyurtimiz haqida tayyorlagan maxsus reportajimizni havola etamiz.
Tanishing: Ergashev Faxriddin Nuriddin o‘g‘li. 1991 yil, 7 avgustda Toshkent shahrida ziyolilar oilasida tug‘ilgan. 2007 yil Toshkent shahar Uchtepa tumanidagi 203-o‘rta maktabni qizil shahodatnoma bilan bitirib, Jahon iqtisodiyoti va diplomatiya universiteti qoshidagi Shayxontohur akademik litseyiga imtiyozli ravishda qabul qilingan. Yapon, nemis, rus, ingliz tillarini mukammal biladi.
Gemaniyada olingan mahorat darslari
2009 yil Toshkentdagi Gyote instituti tomonidan o‘tkazilgan imtihonda katnashib, grant asosida Germaniyaning Berlin shahrida nemis tili yozgi o‘quv kursida bir oy tahsil olish imkoniyatini qo‘lga kiritadi.
Oliy o‘quv yurtida o‘tgan yillar
2010-2014 yillar davomida Toshkent Davlat sharqshunoslik institutining yapon filologiyasi yo‘nalishida tahsil oldi. Shu davr mobaynida O‘zbekiston miqyosida 2013 yil Qozog‘istonda bo‘lib o‘tgan O‘rta Osiyo miqyosidagi yapon tili notiqlik san'ati tanlovlarida ishtirok etib keldi.
Tarjimonlik borasidagi tajriba
Talabalik chog‘ida turli xil xalqaro anjumanlar, tadbirlarga tashrif buyurib, chet ellik mehmonlarga tarjimonlik qildi. Arxeologlar, muhandislar, jurnalistlar, teleoperatorlarga tarjimonlik qilib, Orol bo‘yi davlatlari, Janubiy Surxondaryo, Andijon vodiysi, Samarqand, Xiva kabi maskanlarda xorijlik mehmonlar bilan birga sayohatda bo‘ldi.
Yaponiya magistratura bosqichi uchun o‘z eshiklarini ochdi
Institutning 4-bosqichida o‘qib yurgan kezlari Yaponiyaning Tokio chet tillari universiteti hamda Toshkent davlat sharqshunoslik universiteti o‘rtasidagi o‘zaro hamkorlik shartnomasiga muvofiq o‘tkazilgan imtihondan muvaffaqiyatli o‘tib, Yaponiya ta'lim, fan va madaniyat vazirligi granti sohibiga aylandi.
Hozirgi kunda shu grant asosida Tokio chet tillari universitetining Xalqaro munosabatlar yo‘nalishi, magistratura bosqichida tahsil olmoqda.
Yaponiyadagi qo‘shimcha faoliyat
Faxriddin Yaponiya-O‘zbekiston jamiyatida yaponlarga o‘zbek tilini o‘rgatadi. Hozirda 40 ga yaqin turli yoshdagi yaponlar o‘zbek tilini o‘rganmoqda. Shuningdek, turli tadbirlarda boshlovchilik qilib, Yaponiya boshlang‘ich va o‘rta maktablariga borib, O‘zbekiston haqida turli taqdimotlar o‘tkazadi.
Yaponlarning yuksak e'tirofi
23 aprel kuni Tokio shahrida chet el elchixonasi xodimlari va chet elliklar o‘rtasida 19-marotaba "Yapon tilida notiqlik san'ati" tanlovi bo‘lib o‘tdi. Unda 20ga yaqin turli davlat elchixona vakillari va chet elliklar ishtirok etdi. Faxriddin mazkur tanlovda faxrli birinchi o‘rinni oldi va Yaponiya Tashqi ishlar vazirining maxsus sovriniga sazovor bo‘ldi.
Hayotdagi shiori
Qanday vaziyat bo‘lishidan qat'i nazar, chin ko‘ngildan mehnat kilish. Bugungi qilinayotgan mehnat, harakatlar bir kun, albatta, o‘z samarasini beradi
Yaponiyadagi eng mashxur sumitomo po‘lat quyish zavodiga sayoxat
Boshlang‘ich maktabda prezentatsiya
Yaponlar uyida mehmonda
Fuji tog‘i
Yaponiyaning O‘zbekistondagi sobik elchisi, bosh vazir maslahatchisi va parlament deputati Nakayama xonim bilan
"Hayotimdagi eng qadrli sovg‘a - bu mening oilam. Ota-onam va yaqinlarim. Ko‘pchilik meni omadlisan, deydi. Lekin mening eng katta omadim - shunday oilada tug‘ilganim. Ota-onam meni doim qo‘llab-quvvatlab, o‘qishimga sharoit yaratishgani uchun shu darajaga yetdim. Bu yutug‘im nafaqat mening, balki oilam va barcha o‘zbek xalqiniki, deb hisoblayman", - dedi Faxriddin.
Feruza Avazova tayyorladi.