Burundining sobiq prezidenti Jan-Batist Bagaza olamdan o‘tdi. U 4 may kuni Bryussel shifoxonasida 69 yoshida vafot etgan. Bu haqda Sinxua agentligiga tayanib TASS xabar berdi.
Jan-Batist Afrikadagi bu davlatni 1976-1987 yillarda boshqargan.
Burundi hukumati sobiq davlat rahbarining vafoti tufayli mamlakatda uch kunlik motam e'lon qildi.
Jan-Batist Bagaza tutsi qabilasidan chiqqan. Uning hukumat tepasiga kelishi arafasidagi yillarida tutsi hamda xutu qabilalari o‘rtasida tez-tez qonli to‘qnashuvlar bo‘lib turar edi.
1976 yilda polkovnik Jan-Batist Bagaza bosh shtabga rahbarlik qilgan davrda harbiy to‘ntarish amalga oshirdi, natijada Burundining birinchi prezidenti tutsi qabilasi vakili Mishel Michombergo hukumatdan ag‘dariladi. Bagaza davlatga rahbarlik qilgan davr deyarli tinch o‘tgan. U 1987 yili qon to‘kmasdan amalga oshirilgan harbiy to‘ntarish davomida hokimiyatdan chetlatiladi. Uning o‘rniga tutsi qabilasidan Per Buyoya prezident etib tayinlanadi.
Bagaza avvaliga Uganda keyin Liviya davlatida qochqinlikda yashaydi. 1994 yili u Burundiga qaytadi. U milliy tiklanish partiyasini boshqardi va bir umrlik senator maqomini oldi.