4-avgust kungi savdolarda qora oltin narxi ko‘tarilmoqda. Bunga, AQSh energetika vazirligining mamlakatdagi benzin zaxirasi sezilarli kamaygani to‘g‘risidagi axboroti sabab bo‘lmoqda.
Toshkent vaqti bilan soat 9:44 da Brent rusumli neft aralashmasining oktabr oyi fyuchersi uchun bir barreli 0,46 foizga qimmatlashib, 43,30 dollarga baholandi. WTI neftining bir barreli sentabr oyi fyuchersi uchun 0,76 foizga qimmatlashgan va bir barreli 41,14 dollardan sotilgan.
AQSh energetika vazirligi xabariga ko‘ra, mamlakatdagi tijoriy neft zaxirasi kutilmaganda 1,4 million barrelga ortib, 522,5 million barrelga yetgan. Tahlilchilar, bu raqamning pasayishini taxmin qilishgan edi.
Shunga qaramay, sarmoyadorlarning e'tiborini boshqa hisobot tortgan. Xususan, AQShdagi benzin zaxirasi o‘tgan haftada 3,3 million barrelga kamayib, 238,2 million barrelga tushgan. Ekspertlar esa, bu borada 0,2 million barrel qisqarishini aytishgandi. Shunga ko‘ra, ko‘plab sarmoyadorlarning AQShdagi yonilg‘i zaxirasi ko‘pligi borasidagi xavotirlari o‘z tasdig‘ini topmagan.
