Germaniya kansleri Angela Merkel 4-muddatga kansler lavozimiga nomzodini qo‘yishga tayyorligini ma'lum qildi. Bu haqda DPA axborot agentligi xabar bermoqda.
Merkel bu haqda Berlinda o‘zining "Xristian-demokratik ittifoq" partiyasi prezidiumining yopiq majlisida aytib o‘tdi. Merkel bu haqda 20 noyabr mahalliy vaqt bilan soat 19:00da (Toshkent vaqti bilan 23.00) rasman ma'lum qilishi kutilmoqda.
Merkel ilk marta 2005 yilda kansler bo‘lgan. Hanuzgacha bu lavozimda faqatgina Gelmut Kol to‘rt muddat o‘tirgan, u bu lavozimni 1982-1998 yillar davomida egallagan.
Jamoatchilik fikrini o‘rganish instituti Emnid tomonidan o‘tkazilgan so‘rovnoma ma'lumotlariga ko‘ra, 55 foiz nemislar Merkelning qayta saylanishini istashmoqda, 39 foiz nemislar esa bunga qarshi chiqishmoqda.