Turkiya hukumati 2017 yilda respublikaga turistlarni olib keluvchi har bir samolyot uchun 6 ming dollardan to‘laydi. Bu haqda bosh vazir Binali Yildirim parlamentdagi chiqishida ma'lum qilgan.
"2016 yilgi muammolar sabab turistik sohadagi ishlar unchalik yaxshi emas. Biz Rossiya bilan munosabatlarning sovuqlashuvi va isyon sabab kerakli natijalarni qo‘lga kirita olmadik. Tovon puli tariqasida turistik operatorlarga sayyohlarni olib kelgan har bir samolyot uchun 6 ming dollar to‘laymiz", - dedi u.
Bosh vazirning ta'kidlashicha, gap “Antalya, Mugla, Denizli, Isparta va Trabzon aeroportlarida 2017 yilning 1 yanvaridan 31 dekabriga qadar” qo‘nadigan samolyotlar haqida bormoqda. Tovon puli esa eng yirik turistik agenliklariga beriladi. “Sig‘imi 200 dan ziyod yo‘lovchini tashkil etuvchi samolyot kamida 150 nafar sayyohni olib kelsa, tovon puli 30 foizga ko‘proq, ya'ni 7800 dollarni tashkil etadi”, - xabar qildi Yildirim.
Xuddi shunday choralar 2016 yilning boshida ham amalga oshirilgandi. Ular cho‘milish mavsumida amalga tatbiq etilgan bo‘lib, o‘shanda ham eng yirik turistik agentliklarini qamrab olgan.
