Fast Retailing kompaniyasi asoschisi va prezidenti Tadasi Yanaining moliyaviy ahvoli bir kunda 1,4 milliard dollarga kamaydi. Riteyler guruhiga kiruvchi Uniqlo'ning 2016 yilning dekabrida sotuvlar pasayganligi to‘g‘risidagi hisobotidan keyin ana shunday holat kuzatildi. Bloomberg nashri shu haqida xabar berdi.
Uniqlo hisobotidan keyin Fast Retailing aksiyalari 6 yanvarda Tokiya birjasidagi savdolar davomida 6,7 foizga tushib ketdi. Kompaniyaning qimmatli qog‘ozlari narxi pasayishi fonida Yanaining moliyaviy ahvoli 1,4 milliard dollarga qisqarib, 17,7 milliard dollarni tashkil qildi.
Shunga qaramay, Yanai Bloomberg indeksida Yaponiyadagi eng badavlat inson maqomini saqlab qoldi. Undan keyingi o‘rinlarda SoftBank rahbari Masayosi Son (13,6 milliard dollar) va Keyence asoschisi Takemitsu Takidzaki (11,1 milliard dollar) nomlari qayd etilgan. Umumiy ro‘yxatda esa Yanai 44-o‘rinni egallagan.
