Malayziya sudi KXDR yetakchisining o‘gay akasi Kim Chen Namning o‘limiga doir ish bo‘yicha shimoliy koreyalik diplomatni hibsga olishga ko‘rsatma berishi mumkin. Diplomat politsiya mahkamasiga kelishdan bosh tortsa, shunday chora ko‘rilishi ehtimol, deb xabar qilmoqda Reuters agentligi. Bu haqda Malayziyaning Selangor shtati politsiya mahkamasi rahbari Abul Samax Mat ma'lum qilgan.
Uning so‘zlariga ko‘ra, diplomatga o‘z xohishi bilan politsiyaga kelishi uchun muddat beriladi. Shundan so‘ng, unga tergov bilan hamkorlik qilish bo‘yicha ogohlantirish yuboriladi.
"Agar diplomat bunga ham e'tiborsizlik qilsa, politsiya sudga murojaat qiladi va diplomatni hibsga olish bo‘yicha order berishni so‘raydi", - degan politsiya rahbari.
14 fevralda Malayziya politsiyasi Kim Chen Namning o‘limini tasdiqlagan edi. Unga suiqasd qilishda 8 kishi gumon qilinmoqda. Ulardan 4 nafari qo‘lga olingan, 4 nafari suiqasd sodir etilgan kuni KXDRga chiqib ketishga ulgurgan.
Rasmiy Pxenyan marhumning davlat rahbari Kim Chen Inga umuman aloqasi yo‘qligini ta'kidlamoqda.
