22:42 / 06.04.2017
21949

Peterburg terakti bo‘yicha 8 kishi qo‘lga olindi

Sankt-Peterburg metrosidagi portlash bo‘yicha olib borilayotgan tekshiruvlar davomida teraktga aloqadorlikda gumon qilingan 8 kishi qo‘lga olingan. Bu haqda Tergov qo‘mitasi rasmiy vakili Svetlana Petrenko ma'lum qilgan.

"FXX va IIV hamkorligida olib borilgan reydlar natijasida Sankt-Peterburgda 6 kishi, Moskvada esa 2 kishi teraktga aloqadorlikda gumon qilinib, qo‘lga olindi", degan u.

Uning so‘zlariga ko‘ra, Sayfulla Hakimov, Ibrohimjon Ermatov, Dilmurod Mo‘ydinov, Bahrom Ergashev, A'zamjon Mahmudov, Muhammadyusuf Mirzaolimov, Shohista Karimova va Sodiq Ortiqov qo‘lga olingan.

Qo‘lga olish tadbirlari davomida ular yashayotgan uylardan "Ploshchad Vosstaniya" bekatida topilgan bombaga o‘xshash portlovchi qurilmalar, qurollar va o‘q-dorilar musodara qilingan.

3 aprel kuni metroning "Sennaya ploshchad" va "Texnologicheskiy institut-2" bekatlari oralig‘ida harakatlangan poyezd vagonida portlash sodir bo‘lib, 14 kishi halok bo‘ldi.

Yana bir bomba "Ploshchad Vosstaniya" bekatidan topildi, uni zararsizlantirishdi.

Tergov ushbu terakt ijrochisi Qirg‘izistonda 1995 yilda tug‘ilgan, 2011 yilda Rossiya fuqaroligini olgan Akbarjon Jalilov ekanini tasdiqladi.

Top