Xitoy xalq respublikasi raisi Si Tszinpinga tegishli samolyot AQShdagi uchrashuvdan keyin Pekinga qaytar ekan, Alyaska shtatida to‘xtadi. Uning davomida Xitoy rahbari shtat gubernatori Bill Uoker bilan uchrashdi, deb xabar bermoqda Associated Press.
Ma'lumotlarga ko‘ra, Si Tszinpin samolyoti Alyaskaning eng katta shahri – Ankorijda yoqilg‘i quydirish maqsadida qo‘ngan. Aeroportda XXR raisini gubernator va boshqa rasmiy shaxslar kutib olishdi. Shundan so‘ng Uoker va Si Tszinpin shahar hamda uning atrofini tomosha qilishgan, deb xabar beradi AP.
Ular shuningdek Ankorij mehmonxonalaridan birida ishchi uchrashuvini o‘tkazishni va kechki ovqatni birgalikda tanovvul qilishni rejalashtirgan, deya ta'kidlaydi agentlik. Shundan so‘ng Si Tszinpin aeroportga qaytadi va Xitoyga uchib ketadi.
Xitoy Alyaskaning eng yirik xorijiy savdo sheriklaridan biri sanaladi, biroq Uoker ushbu hamkorlikni yanada mustahkamlash niyatida. "Biz neft, gaz, turizm, baliqchilik, aviatsiya yuk tashuvlari va mineral resurslar sohasida juda katta salohiyatga egamiz", - deya gubernatorning so‘zlarini keltiradi agentlik.
