Saudiya Arabistoni taxti vorislaridan biri, mamlakat mudofaa vaziri Muhammad ibn Salmon Erondagi tuzumni "ekstremistik tuzum" deb atadi va bu davlat bilan kelishuvning imkoni yo‘qligini aytdi.
"Erondagi tuzum ekstremistik g‘oyalarni qo‘llab-quvvatlamoqda. Shu tufayli biz ular bilan kelisha olmaymiz", degan ibn Salmon Saudiyadagi MBC telekanaliga bergan intervyusida.
"Biz va Eron o‘rtasida aloqa nuqtalari mavjud emas", deya qo‘shimcha qilgan u.
Taxt vorisi o‘rinbosarining qayd etishicha, eronliklarning maqsadi Suriya emas, Makka va Ka'ba joylashgan Saudiya Arabistonidir.
"Biz Eron Saudiya Arabistoniga bostirib kirishini kutmoqchi emasmiz", degan u.
Eron va Saudiya Arabistoni o‘rtasidagi munosabatlar Yaqin Sharq hududida 2011 yili boshlangan "arab bahori" inqilobi ortidan buzilgandi. O‘shanda rasmiy Tehron shialarni qo‘llab-quvvatladi, Saudiya Arabistoni sunniylar tomonida turdi. 2016 yilning 3 yanvarida Saudiya Arabistonida shialar imomi Nimr an-Nimr qatl etilgach, saudiyaliklarning Tehrondagi elchixonasiga va Mashhaddagi vakolatxonasiga hujum qilindi. Tez orada ikki davlat o‘rtasidagi diplomatik munosabatlar uzildi.
