Birlashgan Arab Amirliklari hukumati Qozog‘istonning barcha fuqarolariga vizasiz tartibni joriy qilishga qaror qildi. Endilikda, ushbu respublika fuqarolari BAAda bir oygacha muddatda vizasiz yura olishadi.
Qozog‘iston va BAA o‘rtasida konsullik masalalari bo‘yicha qo‘shma komissiyaning birinchi majlisida shu haqda ma'lum qilindi, deb xabar qilmoqda Qozog‘iston TIV matbuot xizmati.
Vazirlik xabariga ko‘ra, «shu boradagi hujjat 23 may kuni ikki davlat tashqi ishlar vazirlari tomonidan imzolanadi».
Komissiya majlisi BAA tashqi ishlar va xalqaro hamkorlik vaziri Abdulloh bin Zayd Al Nahayonning Ostonaga rasmiy tashrifi arafasida bo‘lib o‘tgan. Yig‘ilishda ikki mamlakat o‘rtasidagi konsullik-huquqiy munosabatlarni chuqurlashtirish, ikki davlat fuqarolarining huquq va manfaatlarini himoya qilish, jismoniy va yuridik shaxslarga huquqiy yordam ko‘rsatish, shuningdek, BAA fuqarolarining Ostonada bo‘lib o‘tadigan xalqaro «EKSPO-2017» maxsus ko‘rgazmasiga tashrifiga doir masalalar muhokama etildi.
