Ozarboyjonda jurnalistlarga tekin kvartira tarqatilgani ijtimoiy tarmoqlarda shov-shuvli munozara keltirib chiqardi, deb yozadi Jam-news.net
20 iyul kuni, milliy matbuot kuniga ikki kun qolganida Ozarboyjon prezidenti ikkinchi «jurnalistlar uyi»ning ochilishida ishtirok etdi. Hukumat tomonidan sovg‘a qilingan kvartiralarning sohibi bo‘lgan 133 nafar jurnalist ro‘yxati e'lon qilindi.
«Hozir biz ikkinchi binoning ochilishini nishonlaymiz. Birinchi binoda 156 ta kvartira mavjud edi. Ikkinchisida 255 ta kvartira bor. Bir vaqtning o‘zida, bugun uchinchi binoning poydevoriga tosh qo‘yish marosimini ham o‘tkazamiz. Uchinchi binoda ham 255 ta kvartira bo‘ladi», — degan prezident Ilhom Aliyev ochilish marosimida.
Jurnalistlar orasida ancha taniqli va hurmatli jurnalistlar ham, shuningdek nomlari nafaqat o‘quvchilarga, hattoki hamkasblariga ham tanish bo‘lmaganlari ham bor. Kvartiralar ilgari vafot etgan bir necha jurnalistlarning oilalariga ham topshirilgan.
