25—31 iyul kunlari davomida Hindistonning Lakhnau shahrida xalqaro matematika musobaqasi bo‘lib o‘tdi. Xalq ta'limi vazirligi xabar qilishicha, musobaqada ishtirok etgan o‘zbekistonlik o‘quvchilar 2ta oltin va 2ta kumush medalni qo‘lga kiritib, umumjamoa hisobida 2-o‘rinni egalladi.
Musobaqada dunyoning 41ta davlatidan tashrif buyurgan yosh matematiklar ishtirok etdi.
Qayd etilishicha, mazkur tanlovda to‘rtinchi marta qatnashgan o‘zbekistonliklar ilk bor 2ta oltin medalni qo‘lga kiritishga muvaffaq bo‘ldi.
Buxoro viloyati Qorako‘l tumanidagi 1-sonli ixtisoslashtirilgan davlat umumta'lim maktabining 7-sinf o‘quvchilari Doniyor Ismoilov va Sevaraxon Ostonova individual bahslarda o‘z iqtidorini namoyon etib oltin medalni qo‘lga kiritgan.
Qorako‘ldagi xuddi shu maktabning 7-sinf o‘quvchisi Olimjon Olimov hamda 8-sinf o‘quvchisi Ismoil Po‘latov esa yakkalik bahslarida kumush medalga sazovor bo‘lgan.
