Xitoyning Sichuan viloyatida yuz bergan zilzila oqibatida qurbon bo‘lganlar soni 20 kishiga yetdi. Bu haqda RIA «Novosti» Ngava-Tibet-Tsyan muxtor okrugi ma'lumotiga asosan xabar qilmoqda.
«Mahalliy vaqt bilan soat 12:00 holatiga ko‘ra (Toshkent vaqti bilan soat 9:00) Tszyuchjaygou uyezdida payshanba kuni yuz bergan 7 magnitudali yer silkinishi oqibatida halok bo‘lganlar soni 20 kishiga yetdi, yana 431 inson jabrlandi», - deyiladi xabarda.
Avvalroq 19 kishi halok bo‘lgani va 343 kishi jarohat olgani ma'lum qilingandi.
Eslatib o‘tamiz, Sichuan viloyatida kuchli zilzila 8 avgust kuni kechqurun yuz berdi.
O‘zbekiston Respublikasi Prezidenti Shavkat Mirziyoyev shu munosabat bilan Xitoy Xalq Respublikasi Raisi Si Tszinpinga hamdardlik bildirdi.
