«Barselona» yozgi transferlarda inqirozli holatga tushdi. Jamoani asosiy yetakchilardan biri Neymar tark etdi, uning o‘rni to‘ldirilmadi, rahbariyatning qarorlaridan norozi bo‘lgan boshqa yetakchi futbolchilar, Lionel Messi va Andres Inesta ham ketish taraddudiga tushishgan. Jamoa muxlislari esa rahbariyatdan, ayniqsa, Bartomeuga norozilik bildirib, unga qarshi petitsiya boshlagan.
NeYMARNING KeTIShI
Shartnomasiga «atigi» 222 million tovon puli yozilgan yulduz futbolchiga bo‘lgan munosabatning shunga mos bo‘lmagani muammoni keltirib chiqardi. «Barselona» bu pulga boshqa Neymarni sotib ololmaydi. Klubning ushbu transferga bo‘lgan qarashi, o‘zini tutishidan bemalol bilish mumkinki, kataloniyaliklar Neymarni qo‘yib yuborishni aslo istashmagan.
«Barselona» futbolchi bilan muzokaralar olib borishi, yangi shartnoma tuzishi mumkin edi. Neymarning fonida «Real»ning Garet Beylni qanday qilib hali ham ushlab tura olayotganiga tahsinlar o‘qish mumkin. (Beyl xuddi Neymar kabi, boshqa yulduzlar soyasida qolyapti, buning ustiga Madridda unga nisbatan salbiy munosabatlar juda ko‘p, Beylda zaxirada o‘tirib qolish xavfi bor - ammo baribir «Real» uni jamoada qolishga ko‘ndirishning uddasidan chiqa olyapti).
Yoki vaziyat qo‘lga olinishi va ushbu transfer yordamida foydali kelishuvlarga erishish mumkin edi. Masalan, Marko Veratti. «Barselona» ushbu futbolchiga anchadan beri qiziqib keladi. Uni yoki Di Mariyani, balki ikkovini Neymarning transferiga jalb etib, klub bu transferdan yuta olardi. Shunchaki, Neymarni biroz sabr qilishga undash va vaziyat hokimiga aylanib, o‘z manfaatlarini ilgari surish lozim edi xolos. Yoki transferning e'lon qilinishini kechiktirish orqali, Neymarning o‘rnini bosadigan nomzodlar transferi ustida ishlash uchun vaqt qo‘lga kiritish ham mumkin edi. Neymar ketib bo‘lgach, klubda katta pul borligini va Neymarning o‘rniga baribir futbolchi sotib olishga majbur ekanini bilgan holda, klublar juda katta narxlar qo‘ya boshlashdi.
Qaysidir pallada klub vaziyatni qo‘ldan chiqardi va faqat pul bilan qolib ketdi. Bu voqea klubning imijiga ta'sir ko‘rsatdi va ojiz boshqaruv sifatida futbol olamida namoyon bo‘ldi. «Barselona»ga o‘tishni istayotgan Verattining Parijda qolishga qaror berishi ham aynan Neymarning transferidagi tomonlarning ambitsiyasi ahamiyat kasb etdi. Qaysidir nuqtada Parij klubi «Barselona»dan qudratliroq ko‘rinib qolgandek edi go‘yo...
TOR DOIRA BILAN CheKLANISh
Klub Neymarning ketishi hamono, o‘z maqsadini oshkor qildi - Usmon Dembele va Filip Koutino. Dembelening transferi bir oyga cho‘zildi, Koutino esa, oqibatda «Liverpul»da qoladigan bo‘ldi.
Bilasizmi, bunday uzoq muzokarali transferlarni ko‘p kuzatamiz. Farq shundaki, aksariyat hollarda har ikki klub bir biri tomon qadam tashlagan, faqat narxlarni kelishish qolgan bo‘ladi xolos. Bir taraf narxni tushirish, ikkinchi taraf esa, o‘z istaganini olish uchun ba'zida vaqtni cho‘zishadi. Beyl transferini eslasak, ikki oyga cho‘zilgandi. «Tottenhem» futbolchini sotishga rozi bo‘lgan va o‘z narxini qo‘ygan. «Real» uelslik futbolchi bilan kelishib olgan bo‘lsa-da, so‘nggi kunni, futbolchining narxi pasayishini kutdi. Inglizlar Beyl o‘rnini to‘ldirish uchun o‘yinchilar sotib olishda, «Real» esa Beylga yo‘l ochish uchun futbolchilarni sotishda davom etaverdi. Ziddiyat faqat pulning qanchaligida qolgan edi xolos, judayam «pojar» bo‘lib qolganda, tomonlardan biri o‘sha ma'lum summaga rozi bo‘lishi mumkinligidan xotirjamlik hukm surardi.
Mana shu tarafdan Koutinoning ham, Dembelening ham transferi xavfli edi - ya'ni sotuvchi klublar «Barselona» tomon qadam tashlamagandilar. Sotishni istamayotgandilar. Koutino bilan bo‘lganidek, so‘nggi daqiqada vaziyat teskari ketib qolish e'timoli saqlanib qolayotgandi.
«Barselona» bu faktorni e'tiborga qolgan holda, faqat mana shu ikki futbolchi bilan cheklanmasdan, bir necha yo‘nalishda ish olib borishi maqsadga muvofiq edi. Eden Azar, David Silva, Anxel Di Mariya, Mesut O‘zil yoki yana boshqa futbolchilar ustida ham ishlashga kim xalaqit berdi? Sanchesni Venger raqobatchi klublarga berishni istamagani uchun olib qoldilar, u ham bemalol «Barselona»ga qo‘yib yuborilishi mumkin bo‘lgan, menimcha. So‘nggi kuni «Barselona» xaridor bo‘lgan Tomas Lemar uchun bir oy oldin 50-60 million ustida savdolashilgani esingizdadir? Faqat Bakoyokoning sotilishi «Monako»ning futbolchini sotish fikridan qaytardi va narx oshib ketdi. Ya'ni, «Barselona» o‘z vaqtida boshqa variantlar ustida ham ishlashi taqozo etilardi.
MUZOKARALARDAGI NO‘NOQLIK
Ingliz klublari, «Bavariya» va «PSJ» so‘nggi yillarda bir qator yirik transferlarni amalga oshirdilar. O‘sha transferlarga e'tibor bering - aksariyat hollarda, har tomonlar bunday rozi, kelishuvlar ijobiy ruhda amalga oshirilgan.
«Barselona»ning ushbu darichadagi barcha nishonlari - Koutino, Dembele va Veratti janjalli tus olganiga alohida e'tibor qaratish mumkin. Bularning barchasida qandaydir janjalli holat yuzaga keldi. Qarshi klub bilan samimiy muzokaralar stoliga o‘tirish, kerak bo‘lganda, klubning buyukligi va badavlatligini ilgari surgan holda, tashabbusga erishish va tezda hal qilish mumkin bo‘lgan vaziyatlarda ham, agentlar bilan yashirin kelishuvlar, futbolchilarni o‘z klubiga qarshi qo‘yish kabi noto‘g‘ri usullar qo‘llandi. Bu esa, futbolchiga egalik qilayotgan klublarning badtar jahlini chiqardi va futbolchini sotmaslikni prinsipial ahamiyatga olib chiqdi. Normal muzokaralarda Koutino ham, Veratti ham bemalol «Barselona» libosini kiyishlari mumkin edi, nazarimda.
ORTIQChA FUTBOLChILAR
Neymarning o‘rniga futbolchi olib kelish mana shunday shoshilinch ko‘rinish olganinining sababi bor. «Barselona» so‘nggi yillarda dunyodagi eng kuchli to‘rt hujumchidan uchtasinining egasi ekani, qaysidir ma'noda jamoa zarariga ham ishladi. Mana shu yillarda kelajagi porloq bo‘lgan yosh yulduzlarni klubga olib kelish qiyinlashib ketdi. Sababi futbolchilar baribir «Barselona»da asosiy tarkib uchun kurashish imkonsiz ekanini bilib turishardi. (Misol uchun, o‘sha Usmon Dembele bilan ham klub qiziqqan, ammo Dembele «Borussiya»ni tanlab, bir yil oldin atigi 15 millionga nemis klubiga o‘tgan)
Natijada, klub so‘nggi 3 yildagi transferlar bilan maqtana olmaydi. Menimcha, «Plan B» uchun zaxirada o‘tirishga rozi bo‘ladigan o‘rtacha, ambitsiyasi pastroq futbolchilarni yig‘ish o‘rniga, qisqa muddatli loyihalarga qo‘l urilsa bo‘lardi. Mario Gomes, Robin van Persi, Zlatan Ibrahimovich va boshqa bir nechta variantlar borki, yulduz maqomidagi tajribali futbolchilar qisqa muddatli shartnomalar bilan kelib, jamoaning aniq muammosini yecha olishar, zaxirada o‘tirishga ham rozi bo‘lishar edi. O‘z vaqtida «Barselona» bunday yechimlarga ko‘p bor murojaat qilgan - Xenrik Larsson yoki Terri Anrini eslang.
Hozirda Pablo Alkaser, Arda Turon, Tomas Fermalen, Denis Suares, Andre Gomish kabi noto‘g‘ri bo‘lib chiqqan transfer qurbonlari ko‘p. Bu vaziyatda nafaqat futbolchilar, klubning o‘zi ham «qurbon» bo‘lib qolmoqda. Afsuski, klub bu yo‘nalishda ham ko‘ngildagidek ish olib borolmadi va ortiqcha futbolchilarning hech bo‘lmasa, ijara shartnomalari asosida qutulishning uddasidan chiqa olmayapti. Bu ham klubda ortiqcha «bagaj»ga aylanib qolayotgani, transfer siyosatini chalg‘itayotgani tabiiy hol.
Qahramon Aslanov
