Yevropadagi davlatlardan birida Ukraina talabi bilan mamlakatdan Viktor Yanukovichning atrofidagi shaxslar tomonidan olib chiqib ketilgan 500 kilogramm oltin xatlov qilindi. Bu haqda Ukraina bosh prokurori o‘rinbosari Yevgeniy Yenin Insider nashriga bergan intervyusida aytib o‘tdi.
Uning so‘zlariga ko‘ra, oltin partiyasini xatlov qilish haqidagi ma'lumot bir necha hafta avval paydo bo‘lgan. Gap Yevropadagi qaysi davlat haqida ketayotgani noma'lum. Bunday miqdordagi oltinning bozor narxi 21 million dollardan ortiqni tashkil etadi.
Yeninning so‘zlariga ko‘ra, Yevropa davlatlarida Yanukovich va uning atrofidagi shaxslarning hammasi bo‘lib 200 mln dollarlik aktivlari xatlovga olingan.
Ukraina bosh prokuraturasi Viktor Yanukovich tomonidan mamlakatga yetkazilgan zarar miqdorini 40 mlrd dollarga baholagan. Yanukovichning o‘zi davlatga xiyonatda ayblanmoqda.
