«Real» hujumchisi Krishtianu Ronaldu klubda o‘ziga bo‘lgan munosabatdan norozi bo‘lmoqda.
AS xabariga ko‘ra, portugaliyalik to‘purar bir necha sabablar tufayli klubni tark etishga qaror qilgan.
Avvalo, u yozda Kilian Mbappe transferiga bo‘lgan qiziqishdan norozi bo‘lgan. Hatto, agar yosh iqtidor «Real»ga kelsa, klubni tark etishga ruxsat olgan. Biroq, Mbappe transferi amalga oshmagach, Ronaldu klubda qolgan. Yuz bergan voqeaga kompensatsiya sifatida, u maoshining oshirilishini talab qilgan.
Ikkinchi sabab - «Real»ning Neymarga bo‘lgan qiziqishi. Ronaldu uni o‘ziga raqib bo‘lishini va kelajakda o‘rnini egallashi mumkinligini juda yaxshi tushunib turibdi. Bu esa uni darg‘azab qilmoqda.
Norozilik uchun yana bir sabab - Neymar va Lionel Messining maoshi. Krishtianu dunyoda eng ko‘p maosh oluvchi futbolchi bo‘lishni istayapti, biroq «Real» uning ishtahasini qondirmoqchi emas.
Nihoyat, Ronaldu soliq idoralarining e'tirozi bilan bog‘liq muammoga ega. Ispaniya soliqchilari futbolchidan 15 million yevro talab qilmoqda, «Real» hujumchisi esa hech qanday qonun buzmaganligini ta'kidlamoqda.
