21:00 / 17.11.2017
7684

Haririy Ar-Riyodga nima uchun borganini aytdi

Foto: emaratyah.ae

O‘z iste'fosi haqida e'lon qilgan Livan bosh vaziri Saad Haririy juma kuni Livan kelajagi va uning arab olamidagi o‘rnini muhokama qilish uchun Saudiya Arabistonida bo‘lganini, qolgan barcha taxminlar esa mish-mishdan boshqa narsa emasligini ma'lum qildi. 

"Men Saudiya Arabistonida Livan kelajagi va uning arab olamidagi aloqalari haqida muhokamalar o‘tkazish uchun bo‘ldim. Bunga zid keluvchi qolgan barcha taxminlar, mening tashrifim yoki oilamdagi vaziyatga doir gap-so‘zlar - bor-yo‘g‘i mish-mish", - deb yozadi Haririy o‘z Twitter'ida.

4 noyabr kuni Ar-Riyodda bo‘lgan Haririy kutilmaganda o‘z iste'fosi haqida e'lon qildi. Saudiyaning "Al-Arabiyya" kanalida efirga uzatilgan nutqida u "Hizbulloh" shialar harakati va Eronni Livan hamda arab olamida nizo keltirib chiqarishda aybladi, shu bilan birga, unga qarshi suiqasd uyushtirilayotgani to‘g‘risida ma'lum qildi. 

"Hizbulloh" harakati yetakchisi Hasan Nasrulloh Haririyning iste'fosi sabablarini Saudiya Arabistonidan izlash kerakligini aytdi, Eron TIV esa Haririyning ayblovlarini asossiz deb atadi. Nasrulloh shuningdek Haririyni iste'foga chiqishga majbur qilishganini va ehtimol, Saudiyada majburlab ushlab turishganini aytdi.

Mavzu
Saudiya Arabistonida taxt kurashi

4 noyabr kuni Saudiya Arabistonida 11 nafar shahzoda va 4 nafar yuqori martabali amaldor korrupsiyada ayblanib hibs qilindi. Bu hodisa valiahd shahzoda Muhammad ibn Salmonning o‘z raqobatchilaridan qutulish yo‘lidagi harakati sifatida baholanmoqda.

Barchasi
Top