Ashxoboddagi Coca-Cola Turkmenistan korxonasi yopilish arafasida va mahsulot ishlab chiqarishni to‘xtatdi.
«Xronika Turkmenistana» nashrining xabar berishicha, kompaniya yopilishga sabablar sifatida valyuta konvertatsiyasi bilan bog‘liq mushkulliklar, mamlakatga ichimliklar ishlab chiqarish uchun zarur bo‘lgan tarkibiy qismlarni olib kirishga aloqador muammolar, mahalliy biznes-kompaniyalar tomonidan bosimni keltirishmoqda.
Ayni damda mamlakat bozorlarida Turkmanistonda ishlab chiqarilgan ichimliklarning avvalgi partiyalarini sotib olish mumkin. Ishlab chiqarish to‘xtatilgani tufayli «Koka-Kola» ichimligining hajmi 1 litr bo‘lgan bir butilkasi uchun narx 4-5 manatdan ($1,1-1,4) 8-9 ($2,2-2,5)ga qadar ko‘tarilib ketdi.
Ma'lumot uchun, Coca-Cola Turkmenistan mamlakatda 1998 yildan beri ishlaydi. Ishlab chiqarish hajmi yiliga 88 millionta butilkani tashkil etgan.
