Yuk tashuvchilardan olinadigan soliqlarning eng kam miqdori Prezidentning 29.12.2017 yildagi PQ–3454-son qarori bilan joriy etildi.
Norma.uz’ning yozishicha, chakana savdo korxonalari uchun shunday tartib amal qiladiki, unga ko‘ra ular YaSTni xuddi shunday faoliyat turi bilan shug‘ullanadigan yakka tadbirkorlar uchun qat'iy belgilangan soliq summasidan kam bo‘lmagan miqdorda to‘lashlari kerak bo‘ladi.
2018 yilda soliqlarni to‘lashning shunday tartibi yuk tashish xizmatlari ko‘rsatadigan yuridik shaxslar uchun ham joriy etilmoqda.
Soliq solish tizimidan qat'i nazar, ular tomonidan to‘lanadigan soliqlar va davlat maqsadli jamg‘armalariga majburiy ajratmalarning jami summasi transport vositasining bir birligi hisobida yakka tartibdagi tadbirkorlar tomonidan mazkur faoliyat turi bo‘yicha to‘lanadigan qat'iy belgilangan soliq summasidan kam bo‘lmasligi kerak.
Ma'lumot uchun: mazkur holatda qat'iy belgilangan soliq stavkasi avtotransport vositasining yuk ko‘tarish qobiliyatiga bog‘liq bo‘ladi va 2018 yil uchun:
• 3 tonnagacha – oyiga EKIHning 1,5 baravari;
• 8 tonnagacha – oyiga EKIHning 2 baravari;
• 12 tonnagacha – oyiga EKIHning 3 baravari;
• 12 tonnadan ortiq – oyiga EKIHning 3,5 baravarini tashkil etadi.
Qo‘shimcha hisoblab chiqarilgan summa foyda solig‘ini yoki yagona soliq to‘lovini to‘lash hisobiga kiritiladi.
