Prezidentning 2018 yil 9 yanvardagi PF-5296-son Farmoni bilan Markaziy bank faoliyati tubdan takomillashtirildi. Bu haqda Adliya vazirligining ijtimoiy tarmoqdagi Huquqiy axborot kanalida xabar berilgan.
Farmonga ko‘ra Markaziy bank faoliyatining strategik maqsadli yo‘nalishlari deb quyidagilar belgilandi:
- narxlar barqarorligi;
- bank tizimi barqarorligi va rivojlanishi;
- to‘lov tizimi barqarorligi va rivojlanishi.
Markaziy bankning Bank nazorati va Kredit qo‘mitalari, Bank xizmatlari iste'molchilarining huquqlarini himoya qilish xizmati tashkil etildi.
Quyidagi komissiya va kengashlar tugatildi:
- Respublika bank kengashi;
- Respublika pul-kredit siyosati komissiyasi;
Muddati o‘tkazib yuborilgan debitorlik va byudjyetga to‘lovlar intizomini mustahkamlash bo‘yicha Respublika komissiyasi.
Farmon bilan shuningdek:
- bankrot deb topilgan yoki kredit bo‘yicha uzilmagan qarzdorligi mavjud korxonalarni tijorat banklari mulkiga o‘tkazish tartibi bekor qilindi;
- boshqaruv kompaniyalari, investitsion kompaniya va fondlar, bank faoliyatiga xos bo‘lmagan xo‘jalik yurituvchi sub'yektlar ustav fondlarida banklarning ishtiroki taqiqlandi.
