Navoiy viloyatida bo‘lib o‘tayotgan Qur'on musobaqasining g‘oliblarini taqdirlash uchun Navoiy shahar hokimi Xalilov Umarbek tashrif buyurib, mukofotlarni topshirdi. Bu haqda O‘zbekiston musulmonlari idorasi Matbuot xizmati xabar bermoqda.
Taqdirlash marosimida shahar hokimi so‘zga chiqdi. “Ushbu musobaqa respublikamizda birinchi marta o‘tkazilyapti. Bizning eng asosiy maqsadimiz, viloyatimizda qancha qorilar borligini bilish, ularni qo‘llab-quvvatlash va ilohiy kalomga muhabbatli odamlarni ko‘paytirishdir. Ilk marotaba o‘tkazilayotgan ushbu musobaqada qatnashgan odam tarixda qoladi. Shuningdek, Kim Xudoning kalomini yodlasa, hech qachon kam bo‘lmaydi. Bugun Navoiy shahrimizda o‘zgacha fayz kezib yuribdi. U ham bo‘lsa shahrimizda qorilar jam bo‘lib, shunday musobaqa o‘tkazilishidir. Barchaga muvaffaqiyat tilayman, viloyat g‘oliblarini respublika va xorijda ham faxrli o‘rinlar olishlarini tilayman”, - dedi Xalilov Umarbek.
Navoiy viloyati mutasaddilari tomonidan musobaqa ishtirokchilari va tomoshabinlariga ehson dasturxonlari yozildi hamda esdalik sovg‘alari topshirildi.
Ma'lumot o‘rnida: Sirdaryo viloyatida o‘tgan Qur'on musobaqasining hududiy bosqichiga shaxsan viloyat hokimi tashrif buyurib, ishtirokchilarni taqdirlagan edi.
