BMTning Bolalar jamg‘armasi – YUNISEF to‘qnashuvlar va tabiiy fojialar sababli gumanitar inqirozlar davom etayotgan 51 ta davlatdagi 48 mln bolaga 3,6 mlrd dollarlik yordam ajratishga chaqirdi.
Birinchi navbatda bu yordamga Yaqin Sharq davlatlari, asosan Suriya, Yaman va Iroq bolalari ehtiyoj sezmoqda.
Umumiy miqdordan 1,3 mlrd dollarni Suriyadagi bolalar va suriyalik qochqinlarning Turkiya, Livan, Iordaniya va Iroqdagi farzandlariga ajratish lozim.
YUNISEFning favqulodda dasturlar direktori Manuel Fonteyn Jyenevadagi matbuot anjumanda aytganidek, Myanma, Kongo, Iroq, Nigeriya, Janubiy Sudan, Suriya va Yamanda davom etayotgan qurolli ixtiloflar bolalar hayotiga salbiy ta'sir ko‘rsatadi.
Uning aytishicha, bu davlatlardagi bolalar shoshilinch gumanitar yordamga muhtojlar. “Agar xalqaro hamjamiyat bu bolalarni himoya qilish va ularni hayotiy muhim ehtiyojlar bilan ta'minlash uchun tezkor choralar ko‘rmasa, unda bu bolalar kelajakka umiddan deyarli mahrum bo‘ladilar”, deb aytgan Fonteyn.
YUNISEF vakilining aytishicha, dunyo kun sayin bolalar uchun xavfli joyga aylanmoqda.
Fonteynning aytishicha, 3,6 mlrd dollardan 84 foizi inqiroz sharoitida yashovchi bolalarga shoshilinch gumanitar yordam ko‘rsatishga yo‘naltiriladi.
