Prezident Shavkat Mirziyoyev 2018 yilning bahor oylarida Ozarboyjonga rasmiy tashrif bilan borishi kutilmoqda. Ozarboyjonning O‘zbekistondagi favqulodda va muxtor elchisi Guseyn Guliyev 20 fevral kuni Savdo-sanoat palatasi hamda Xalqaro Press-klub hamkorligida bo‘lib o‘tgan mamlakatlararo biznes-forumda shu haqida ma'lum qildi.
Guliyevning so‘zlariga ko‘ra, ikki mamlakat rahbarlari bir-birlarini yaxshi bilishadi, ular shu kungacha xalqaro maydonlarda ko‘rishishga ulgurishgan. Elchi aniq sanani aytmagan bo‘lsa-da, bu joriy yilning bahor oylaridan birida, ehtimol may oyi oxirida amalga oshishi mumkinligini qayd etdi.
U hozirda ikki tomonlama hamkorlik rivojiga to‘sqinlik qiladigan hech qanday omillar yo‘qligini, mamlakatlar o‘rtasida yuqori darajali siyosiy muloqot kuzatilayotganini ta'kidladi. Elchining ta'kidlashicha, tashrif davomida muhokama qilinadigan masalalar talaygina: neft-gaz sohasidagi hamkorlikdan tortib to qishloq xo‘jalik sohasigacha.
Bundan tashqari, Guseyn Guliyev ham, O‘zbekiston Savdo-sanoat palatasi rahbari Adham Ikramov ham ikki mamlakat o‘rtasidagi aviareyslar soni oshirilishiga ishora qilishgan.