13:20 / 08.03.2018
13857

Xayriya natijasi: Sardorxon va Boburjon davolanish uchun xorijga ketishdi

Shu yilning 5 va 27 yanvar kunlari Samarqand viloyatida istiqomat qiluvchi hamyurtlarimiz, murg‘aq qalb egalari bo‘lgan Sardorxon Ahmadxonov hamda Boburjon Qo‘ldoshaliyevlarning xastalikdan forig‘ bo‘lishlari umidida xayriya aksiyalari boshlangan edi. Sardorxonning orqamiyasida yemirilish borligi, boshmiyasida ham o‘zgarishlar mavjudligini magnit tomografiyasi ko‘rsatgan. Sardorxonning ota-onasi bir necha xorijiy davlatlarga kasallik varaqalarini yuborgan, Turkiyadan ijobiy javob olishgan.                    

Hamyurtimiz Boburjon esa 4-darajali tug‘ma yurak nuqsoni bilan dunyoga kelgani, bu bo‘yicha O‘zbekistonda jarrohlik amaliyoti o‘tkazilmasligi sababli Rossiyadagi Bakulev nomidagi yurak-qon-tomir tizimi jarrohligi klinikasida davolanishi talab qilinar edi. 

Xayriya aksiyalari boshlanishi bilanoq, juda qisqa fursatda yordamga muhtojlarga xayr-ehson qo‘lini cho‘zishga shoshiladigan saxovatpesha hamyurtlarimiz ko‘magida ikki yurtdoshimiz uchun zaruriy mablag‘lar yig‘ildi. 

Foto: Sardorxon Ahmadxonov/Kun.uz

Sardorxon ota-onasi bilan Turkiyaga yo‘l oldi. Biz ular bilan uchrashib, oq yo‘l tiladik va Sardorxonga shifo berishini Allohdan so‘rab qoldik. 

Boburjon ham ota-onasi bilan Rossiyaga ketishdi. Ayni vaqtda ular Moskvada davolanmoqda.  

Foto: Boburjon Qo‘ldoshaliyev/KUN.UZ

Azizlar, mana ikki oila o‘z vatanlarini vaqtincha bo‘lsa-da, tark etib xorijga ketishdi. Ularga musofir yurtlarda bizlarning pulimizdan ham ko‘proq ma'naviy ko‘magimiz, duoimiz muhim. Shu boisdan ham duo qilaylik, shu jajji hamyurtlarimiz xorijdan komil shifo topib kelishsin. Ota-onasi, el-u yurti, Vataniga xizmat qiladigan, ko‘zlarni quvontirib yuradigan, qadamidan o‘t chaqnagan farzandlar bo‘lib voyaga yetishsin! 

Mazkur xayriya aksiyasida o‘zining ozdir-ko‘pdir hissasini qo‘shgan barcha-barchaga Alloh savoblarni ko‘paytirib bersin. Ajrini u dunyo, bu dunyo zoye qilmasin! Omin!

Mavzu
Xayriya aksiyasi
KUN.UZ sayti yordamga muhtoj insonlarga ko‘mak berish niyati bilan qator xayriya aksiyalarini tashkil etib kelmoqda.
Barchasi
Top