14:40 / 19.04.2018
7696

Dorilarni qo‘llash chog‘ida aniqlangan nojo‘ya holatlar bo‘yicha Sog‘liqni saqlash vazirligi ogohlantirilishi shart

Foto: KUN.UZ

O‘zbekiston Respublikasi sog‘liqni saqlash vazirining buyrug‘i bilan Dori vositalarining qo‘llanilishi chog‘ida nojo‘ya reaksiyalar aniqlangan holatlar to‘g‘risida xabardor qilishi tartibi to‘g‘risidagi nizom tasdiqlandi.

Dori vositalarining qo‘llanilishi chog‘ida nojo‘ya reaksiyalar aniqlangan holatlar to‘g‘risida xabardor qilish tartibi to‘g‘risidagi nizomga ko‘ra, «Dori vositalari va farmatsevtika faoliyati to‘g‘risida»gi O‘zbekiston Respublikasi Qonunining 13-moddasiga asosan davolash-profilaktika muassasalari, dorixonalar hamda dori vositalarini ishlab chiqaruvchi, realizatsiya qiluvchi va qo‘llovchi tashkilotlar dori vositalarining qo‘llanilishi chog‘ida nojo‘ya reaksiyalar aniqlangan barcha holatlar to‘g‘risida O‘zbekiston Respublikasi Sog‘liqni saqlash vazirligini yozma shaklda xabardor qilishi shart.

Dori vositalarining qo‘llanilishi chog‘ida nojo‘ya reaksiyalar aniqlangan barcha holatlar to‘g‘risida mazkur Nizomning ilovasiga muvofiq yozma shaklda Dori vositasining qo‘llanilishi chog‘ida nojo‘ya reaksiya aniqlangan holat to‘g‘risidagi xabarnoma rasmiylashtiriladi va u mazkur Nizomda belgilangan muddatlarda O‘zbekiston Respublikasi Sog‘liqni saqlash vazirligiga yuboriladi.

Davolash-profilaktika muassasasida davolanayotgan (shu jumladan statsionar yoki ambulator sharoitda davolanayotgan) shaxsga nisbatan dori vositasini qo‘llash chog‘ida yoki dori vositasi qo‘llanilgandan keyin unda nojo‘ya reaksiyalar kuzatilgan yoki aniqlangan hollarda ushbu holatni kuzatgan yoki aniqlagan davolash-profilaktika muassasasining xodimi bu haqda zudlik bilan davolovchi vrachga xabar berishi zarur.

Davolovchi vrach qo‘llanilgan dori vositasining nojo‘ya reaksiyasi kuzatilganligi yoki aniqlanganligiga ishonch hosil qilsa ushbu holat bo‘yicha 10 kun ichida xabarnomani rasmiylashtiradi va uning O‘zbekiston Respublikasi Sog‘liqni saqlash vazirligiga yuborilishini ta'minlaydi, mazkur Nizomning 7-bandida ko‘rsatilgan hollar bundan mustasno.

Uy sharoitida davolangan bemor o‘zi iste'mol qilgan dori vositasining nojo‘ya reaksiyasi yuzasidan davolash-profilaktika muassasasiga murojaat qilganda, bemorni qabul qilgan vrach unda kuzatilgan yoki aniqlangan nojo‘ya reaksiyaning aynan u qo‘llagan dori vositasining qo‘llanilishi oqibatida yuzaga kelganligiga ishonch hosil qilsa ushbu holat bo‘yicha 10 kun ichida xabarnomani rasmiylashtiradi va uning O‘zbekiston Respublikasi Sog‘liqni saqlash vazirligiga yuborilishini ta'minlaydi, mazkur Nizomning 7-bandida ko‘rsatilgan hollar bundan mustasno.

Bunda xabarnomaning murojaat qilgan shaxsga qirqib berilishi lozim bo‘lgan qismi to‘liq to‘ldirgan holda murojaat qilgan shaxsga berib yuborilishi lozim.

Dorixona hamda dori vositalarini ishlab chiqaruvchi, realizatsiya qiluvchi tashkilotlar o‘zi tomonidan ishlab chiqarilgan yoki realizatsiya qilingan dori vositasining qo‘llanilishi chog‘ida nojo‘ya reaksiya aniqlanganligi (kuzatilganligi) haqida ma'lumot olganda ular bu haqda 10 kun ichida xabarnoma rasmiylashtiradi va uning O‘zbekiston Respublikasi Sog‘liqni saqlash vazirligiga yuborilishini ta'minlaydi, mazkur Nizomning 7-bandida ko‘rsatilgan hollar bundan mustasno.

Bunda dorixona, dori vositalarini ishlab chiqaruvchi va realizatsiya qiluvchi tashkilot xodimiga ushbu tashkilot tomonidan ishlab chiqarilgan yoki realizatsiya qilingan dori vositasining qo‘llanilishi chog‘ida nojo‘ya reaksiya kuzatilganligi yoki aniqlanganligi haqida xabar berilganda, u bu haqda zudlik bilan tashkilot rahbariga, u bo‘lmaganda esa, uning o‘rnini bosuvchi shaxsga ma'lum qiladi.

Dorixona, dori vositalarini ishlab chiqaruvchi va realizatsiya qiluvchi tashkilot rahbari yoki uning o‘rnini bosuvchi shaxs dori vositasining nojo‘ya reaksiyasi kuzatilganligi yoki aniqlanganligi haqidagi xabarga asoslanib xabarnoma rasmiylashtiradi va uning O‘zbekiston Respublikasi Sog‘liqni saqlash vazirligiga yuborilishini ta'minlaydi.

Qo‘llanilgan dori vositasining nojo‘ya reaksiyasi anafilaktik reaksiya, Layyell sindromi yoki Stivens-Djonson sindromi bilan bog‘liq deb xulosa qilinsa yoxud bu haqda ma'lumot kelib tushsa, shuningdek uning oqibatida inson vafot etganligi aniqlansa xabarnoma 1 kun ichida rasmiylashtirilishi va O‘zbekiston Respublikasi Sog‘liqni saqlash vazirligiga yuborilishi lozim.

Davolash-profilaktika muassasasi tomonidan yuboriladigan xabarnoma davolash-profilaktika muassasasi vrachi tomonidan, dorixona hamda dori vositalarini ishlab chiqaruvchi, realizatsiya qiluvchi tashkilotlar tomonidan yuboriladigan xabarnoma esa, ushbu tashkilot rahbari tomonidan imzolangan bo‘lishi shart.

Xabarnomada ko‘rsatilgan ma'lumotlarning to‘g‘riligi hamda uning o‘z vaqtida rasmiylashtirilishi va yuborilishi uchun xabarnomani imzolagan shaxs mas'ul hisoblanadi.

Dori vositalarini qo‘llovchi boshqa tashkilotlar dori vositalarining qo‘llanilishi chog‘ida nojo‘ya reaksiyalar aniqlangan barcha holatlar to‘g‘risida faoliyatining xususiyatiga ko‘ra mazkur Nizomda tegishlicha davolash-profilaktika muassasalari yoxud dorixona, dori vositalarini ishlab chiqaruvchi va realizatsiya qiluvchi tashkilot uchun belgilangan tartibda xabar beradi.

Mazkur Nizomning talablari buzilishida aybdor bo‘lgan shaxslar qonun hujjatlarida belgilangan tartibda javobgar bo‘ladi.

Mazkur Nizom O‘zbekiston Respublikasi Savdo-sanoat palatasi bilan kelishilgan.

Top