AQSh prezidenti Donald Tramp NATOga a'zo barcha mamlakatlardan zudlik bilan mudofaa xarajatlarini YaIMning 2 foiziga yetkazishni talab qildi.
"AQSh Yevropa muhofazasi uchun pul sarflaydi-da, savdo sohasida milliardlab dollarlarni yo‘qotadi. NATO mamlakatlari 2025 yilga borib emas, hozirning o‘zidayoq YaIMning 2 foizini to‘lashlari kerak", - deb yozadi u o‘zining Twitter'ida.
"Germaniya gaz va energiya resurslari uchun Rossiyaga milliardlab dollar to‘lasa, NATOdan qanday naf? Nima uchun 29 mamlakatdan atigi beshtasigina o‘z majburiyatlarini bajarmoqda?", - deya savol bilan yuzlanadi Amerika prezidenti.
Bundan avval Oq uy matbuot kotibi Sara Sanders Tramp alyans sammiti davomida NATOga a'zo mamlakatlarga o‘zlarining mudofaa xarajatlarini YaIMning 4 foizigacha chiqarishni taklif qilgani haqida aytgandi. "NATO sammitidagi bugungi nutqi davomida prezident tashkilotga a'zo mamlakatlarga mudofaa xarajatlarini nafaqat YaIMning 2 foizigacha yetkazishga doir majburiyatlarini bajarishlarini, balki bu ko‘rsatkichni 4 foizgacha chiqarishini taklif qildi", - dedi Sanders.
Bolgariya prezidenti Rumen Radev Amerika prezidentining bunday talabi haqida shunday fikr bildirdi: "Bu raqamlar e'lon qilinganidan keyin u (Donald Tramp - tahr.) uchrashuvni tark etdi, keyingi chiqishlar davomida uning talabi boshqa tilga olinmadi", - deydi Radev.
"NATO - xavfsizlik sotib olinadigan birja emas, biroq boshqa tomondan, prezident Tramp haq, zero har bir davlat samarali mudofaa xususiyatlarini qurishi kerak. Shunday bo‘lsa-da, Bolgariyadagi xavfsizlikka mablag‘lar qay darajada xohishga qarshi ajratilayotgani ayon", - deya prezidentning so‘zlarini keltirgan Bolgariya milliy radiosi.
Radevning fikricha, AQSh tomonidan bosim davom etadi va bu transatlantik beqarorlik yuzasidan Rossiya bilan muloqot qilish zarur.
