O‘zbekiston milliy kurash sporti jamoasining 6 nafar vakili Osiyo o‘yinlari yarim finaliga chiqdi.
O‘zbekiston jamoasining -52 kg vazn toifasidagi vakili Gulnora Sulaymonova ishtirokini saralash bosqichidan boshladi. U dastlabki raqibi, indoneziyalik Maya Sari Sembiringni osonlik bilan mag‘lub etdi va nimchorak finalga chiqdi.
Keyingi bosqichda uning raqibi qozog‘istonlik Akjo‘l Kayipxan bo‘ldi. Sulaymonova bu raqibini ham 10:0 hisobida taslim etdi.
Chorak finalda esa u mo‘g‘ulistonlik Gerelma Erdenetsogtni 10:0 hisobida yengdi va yarim final yo‘llanmasini qo‘lga kiritdi.
Endi u final yo‘llanmasi uchun hindistonlik Yadhav Malaprabha Yallappaga qarshi gilamga chiqadi.
-52 kg vazn toifasidagi Oysuluv Abdumajidova esa bahslarga nimchorak finaldan kirishdi. U dastlab turkmanistonlik Anastasiya Makeyevaga qarshi gilamga chiqib, 5:0 hisobida g‘alaba qozondi. Chorak finalda esa eronlik Tahira Azarpayvand bilan bellashgan o‘zbekistonlik sportchi qiyin g‘alabani qo‘lga kiritib (5:0), yarim finalga chiqdi.
Endi Abdumajidova final yo‘llanmasi uchun hindistonlik Pinski Balhara bilan bellashadi.
Bungacha -66 kg vazn toifasi vakillari Ma'ruf G‘aybulloyev va Ruslan Bo‘riyev, +90 kg vazn toifasida ishtirok etayotgan Muhsin Hisomiddinov va Nurbek To‘rayev ham yarim final ishtirokchilariga aylandi. Bu esa yarim final bellashuvlaridan oldin O‘zbekiston jamoasi 6 medalni naqd qilganini anglatadi.
