8356.18 USD +19.11

9582.03 EUR +83.61

124.97 RUB +1.61

10730.2 GBP +120.41

21:50 / 10.10.2018 31294

Prezident raisligidagi yig‘ilishda Qurolli Kuchlarni isloh qilish bo‘yicha qarorlar qabul qilindi

Foto: Prezident matbuot xizmati

10 oktabr kuni O‘zbekiston Respublikasi Prezidenti Shavkat Mirziyoyev raisligida mudofaa qurilishi va O‘zbekiston Respublikasi Qurolli Kuchlarini rivojlantirish masalalariga bag‘ishlangan xizmat yig‘ilishi bo‘lib o‘tdi. Bu haqda prezident matbuot xizmati xabar bermoqda.

Yig‘ilishda qo‘shinlarning jangovar shayligi va jangovar qobiliyatini yanada oshirish, ularni zamonaviy qurol-yarog‘ va harbiy texnika bilan ta'minlash, mavjud qurol-yarog‘ namunalarini modernizatsiya qilish, mintaqa va dunyo mamlakatlari bilan harbiy va harbiy-texnik hamkorlikni faollashtirish, harbiy shaharchalar infratuzilma obektlarini, qo‘shinlarning texnik va front orti ta'minoti tizimlarini rivojlantirish, shuningdek, harbiy xizmatchilar, ularning oila a'zolari va Qurolli Kuchlar faxriylarini ijtimoiy muhofaza qilish masalalari muhokama qilingan.

Harbiy okrug qo‘mondonliklarining harbiy-ma'muriy sektorlar rahbariyati bilan yoshlarni harbiy-vatanparvarlik ruhida tarbiyalash, qo‘shinlarning kundalik samarali faoliyatini tashkil etishda qo‘shilma va qismlar komandirlariga ko‘maklashish, harbiy xizmatchilarning ijtimoiy himoyasini kuchaytirish borasidagi hamkorlik faoliyatining oraliq yakunlari ham ko‘rib chiqilgan.

Mudofaa vazirligi mas'ul mansabdor shaxslarining qo‘shinlarning samarali jangovar va ma'naviy-ma'rifiy tayyorgarligini oshirish, boshqaruv organlari, birlashmalar, qo‘shilma va qismlar, oliy harbiy ta'lim muassasalari, shuningdek, mahalliy harbiy boshqaruv organlari tomonidan amalga oshirilgan ishlar to‘g‘risidagi ma'ruzalari tinglandi.

Mudofaa vazirligining axborotiga ko‘ra, hisobot davrida jami 120dan ortiq tezkor-jangovar tayyorgarlik tadbirlari o‘tkazilgan, ularda tegishli vazirlik va idoralarning 15 mingdan ziyod harbiy xizmatchilari, shuningdek, davlat va xo‘jalik boshqaruvi, mahalliy  davlat hokimiyati organlari vakillari ishtirok etgan.

Amalga oshirilgan ishlar natijasida harbiy okruglarning jangovar imkoniyatlari sezilarli darajada kengaydi, doimiy shay holatdagi va maxsus topshiriqli mutlaqo yangi bo‘linmalar tuzildi. Ko‘rilgan chora-tadbirlar tufayli qo‘shinlarning jangovar tayyorgarlik samaradorligi oshdi, bo‘linmalar jangovar shayligining vaqtga doir ko‘rsatkichlari ikki barobar qisqartirildi, shaxsiy tarkibning professionallik darajasi yuksaldi.

Qisqa muddatda xorijning ilg‘or texnologiyalari va zamonaviy o‘quv vositalarini o‘zida mujassam etgan yangilangan Qurolli Kuchlar akademiyasi tashkil etildi.

Xizmat yig‘ilishi yakunlari bo‘yicha prezident tomonidan Qurolli Kuchlar faoliyatini yanada takomillashtirish va umuman mamlakat mudofaa qobiliyatini yuksaltirishning ustuvor yo‘nalish va vazifalari belgilab berilgan. Qurolli Kuchlarni yanada isloh qilish bo‘yicha tegishli qarorlar qabul qilingan.

Top