Gap shundaki, aksiyadorlik tijorat Xalq banki Jizzax viloyati filialiga Jahon bankining Xalqaro qishloq xo‘jaligi taraqqiyoti jamg‘armasi (MFSR) tomonidan taqdim etilgan pul mablag‘lari hisobidan jami 1 351.9 ming AQSh dollari miqdorida qishloq xo‘jaligi texnikasi hamda naslli chorva mollari sotib olish uchun ajratib berildi.
Jumladan, bankning Arnasoy filiali mijozi "Sangzor" fermer xo‘jaligiga naslli yirik shoxli chorva mollari sotib olish uchun 89,7 ming AQSh dollari miqdoridagi mablag‘ ajratildi. Fermer ushbu mablag‘ga Avstriya davlatidan Simmental zotli 33 bosh chorva moli olib kelib, xo‘jalikdagi chorva mollar sonini 265 boshga yetkazdi. Ayni paytda aholiga sifatli go‘sht va sut mahsulotlari yetkazib bermoqda.
- Yoshligimdan chorvaga qiziqaman, shuning uchun 2010 yilda chorvachilikka ixtisoslashgan fermer xo‘jaligi tashkil qildim, - deydi Sharof Rashidov tumanidagi “Jizzax samo chashmasi” fermer xo‘jaligi rahbari Kamol Qahhorov. – Joriy yil boshida Xalq bankida Jahon banki tomonidan taqdim qilingan sarmoya doirasida pul mablag‘lari ajratilayotgani haqida eshitib, bankning tuman filialiga murojaat qildim. Menga bank tomonidan ma'lum shartlar asosida 86,9 ming AQSh dollari miqdorida mablag‘ ajratildi. Shundan so‘ng Avstriya mamlakatidan 33 bosh Shvits zotli naslli chorva moli olib keldim.
Darhaqiqat, ushbu tashabbuskor fermerning rejalari bisyor. Ayni paytda 86 bosh qoramolga ega xo‘jalikni yirik chorva kompleksiga aylantirish harakatida yuribdi. Kelajakda sut va go‘sht mahsulotlarini qayta ishlovchi uskunalar o‘rnatish niyati ham bor. Bularning barchasini xorijiy sarmoya ko‘magida amalga oshirmoqchi.
Texnikani fermerning qanotiga qiyoslashishi bejizga emas, chunki texnikaning kuchi fermerning uzog‘ini yaqin, og‘irini esa yengil qiladi. Jahon bankining qishloq xo‘jaligini rivojlantirish borasidagi loyihalari doirasida viloyatdagi ko‘plab fermerlar chetdan zamonaviy texnikalar olib kelmoqda.
Misol uchun Mirzacho‘l tumanidagi "Saxiy Mirzacho‘l" fermer xo‘jaligi rahbari Gulchehra Qilichevani zamonaviy New Holland rusumli traktor olish rejasi bor edi. Lekin ushbu texnikani xorijdan yaxshigina mablag‘ evaziga olib kelish uchun fermer opada yetarlicha mablag‘ yo‘q edi. Shunda fermerga Xalq bankining tuman filiali xodimlari ushbu qimmatbaho texnikani bank tomonidan ma'lum shartlar asosida ajratiladigan mablag‘ evaziga sotib olish taklifini berishdi. Bu taklif Gulchehra Qilichevaga ham ma'qul tushdi. Shundan so‘ng bank tomonidan ajratilgan 72,6 ming AQSh dollari miqdoridagi pul mablag‘i evaziga Belarussiya davlatidan 2 dona New Holland texnikasi sotib olindi.
Umuman olganda Jizzax viloyatida Xalq banki tomonidan berilayotgan xorijiy pul mablag‘lari orqali o‘z biznesini rivojlantirayotgan fermer xo‘jaliklari ko‘pchilikni tashkil etadi. Jumladan, Sharof Rashidov tumanidagi "Jizzax stroy produkt" mas'uliyati cheklangan jamiyati, "Ruslan-Mega" fermer xo‘jaligi, Baxmal tumanidagi "Baxmal milk" fermer xo‘jaligi, "Navro‘za Suyunova" xususiy korxonasi, Mirzacho‘l tumanidagi "Uxum Chorvadori", "Saxiy Mirzacho‘l" fermer xo‘jaliklari, G‘allaorol tumanidagi "PRODUCTS AGRO" fermer xo‘jaligi, Zomin tumanidagi "Qo‘ng‘irboy" mas'uliyati cheklangan jamiyati, Zarbdor tumanidagi "Nur Chorva" fermer xo‘jaliklariga jami 1 351,9 ming AQSh dollari miqdoridagi pul mablag‘lari qishloq xo‘jaligi texnikasi hamda naslli chorva mollari sotib olish uchun ajratib berildi.
Reklama huquqi asosida
