Maktabgacha ta'lim vazirining buyrug‘i bilan Maktabgacha ta'lim muassasasining kuzatuv kengashi haqidagi namunaviy nizom tasdiqlandi.
Nizomga ko‘ra, kengashning asosiy maqsadlari quyidagilardan iborat:
muassasaning ustuvor vazifalarini belgilash;
maktabgacha ta'lim tuman (shahar) bo‘linmasi tomonidan tavsiya etilgan nomzodlar tarkibidan maktabgacha ta'lim muassasasi rahbarini saylash;
muassasaning maqsadlari va vazifalarini hamda ularga erishish rejalarini tasdiqlash;
muassasada amalga oshirilishi belgilangan vazifalarning bajarilishi va maqsadli ko‘rsatkichlarga erishilishi ustidan nazorat olib borish.
Kengashning asosiy vazifalari quyidagilardan iborat:
hududiy bo‘linma tomonidan tavsiya etilgan nomzodlar tarkibidan muassasa rahbarini saylash, shuningdek uni egallab turgan lavozimidan ozod etish haqida muassasani rivojlantirishning ustuvor yo‘nalishlarini belgilash;
muassasa faoliyatini takomillashtirish, moliyaviy-xo‘jalik holati, daromadlar va xarajatlar, byudjyet va byudjyetdan tashqari hamda homiylik mablag‘laridan foydalanish bo‘yicha amalga oshirilgan ishlar to‘g‘risida muassasa rahbarining hisobotlarini tinglash;
muassasaning yillik moliyaviy rejalarini, ko‘rsatilayotgan pullik xizmatlar narxining miqdorlarini va muassasa mulkidan foydalanganlik uchun ijara haqi miqdorini, shu jumladan auksiondagi boshlang‘ich narxni muassasa rahbarining ishtirokida tanishib chiqish va takliflar berish;
muassasa rahbari, pedagog va boshqa xodimlarining faoliyati bo‘yicha ijtimoiy so‘rovlar o‘tkazish;
muassasada tarbiyalanuvchilar uchun qulay shart-sharoitlar yaratish hamda ularni yaxshilash bo‘yicha ota-onalar va jamoatchilik tashkilotlari va homiylar bilan hamkorlik qilishda amaliy yordam ko‘rsatish;
muassasani rivojlantirishga doir ustuvor yo‘nalishlarni belgilash bo‘yicha ta'lim muassasasi rahbarining dastur va rejalari yuzasidan hududiy bo‘linmaga takliflar kiritish;
muassasaning xodimlarini rag‘batlantirish bo‘yicha hududiy bo‘linmaga takliflar berish.
Muassasada bolalarning sifatli ta'lim olishlari, ularga tegishli shart-sharoitlar yaratish hamda ta'lim-tarbiya jarayonlarini qo‘llab-quvvatlash maqsadida muassasa rahbariga ko‘maklashish uchun har bir muassasada Kengash tashkil etiladi.
Kengash 11 kishidan kam bo‘lmagan toq sondan iborat tarkibda tuziladi. Bunda, Kengash tarkibiga muassasaning pedagoglari orasidan 2 nafar, tarbiyachi yordamchilari orasidan 2 nafar, muassasa ma'muriyatidan 1 nafar, tegishli hududiy bo‘linmadan 1 nafar, jamoat tashkilotlari va homiylar orasidan 2 nafar hamda har bir guruhida tarbiyalanuvchilarning ota-onalaridan kamida 3 nafar a'zo kiritiladi.
Kengash tarkibi 3 yil muddatga saylanadi. Bunda Kengash tarkibi har o‘quv yili boshida ko‘rib chiqilishi mumkin.
Kengash a'zolari muassasa tarbiyalanuvchilari ota-onalarining umumiy yig‘ilishida ochiq ovoz berish yo‘li bilan saylanadi.
Kengash o‘ziga yuklatilgan vazifalarni amalga oshirishda quyidagi huquqlarga ega:
muassasaning tegishli davrdagi faoliyati bo‘yicha muassasa rahbaridan ma'lumotlar so‘rash va olish;
muassasaning moliyaviy hisobotlari bilan tanishish;
homiylik va xayriya mablag‘larining kirim qilinishi va sarflanishi haqidagi ma'lumotlar bilan tanishish;
muassasa pedagog xodimlarining sha'ni, qadr-qimmati, obro‘sini himoya qilish bo‘yicha takliflar kiritish.
