Los-Anjyelesdagi bosmaxona ishi uning kompyuter tizimiga virus tushishi oqibatida izdan chiqdi. Shu sababli bir necha yirik gazetalarning chop etilishi to‘xtab qoldi. Bu haqda Associated Press axborot agentligi xabar berdi.
Ta'kidlanishicha, 29 dekabrda hamma obunachilarga ham gazetalarning navbatdagi soni yetib bormagan. Bu gazetalar orasida The Wall Street Journal, The New York Times, Los Angeles Times va The San Diego Union-Tribune bor. Shuningdek, 30 dekabrda ham gazetalar hammaga yetkazib berilmasligi mumkin.
Bosmaxona Los Angeles Times nashriga tegishli bo‘lib, uning saytida gap “zararli dastur vositasida hujum qilingani” haqida borayotgani ma'lum qilingan. Ushbu muammo 28 dekabrda aniqlangan, biroq texnik mutaxassislar uni bartaraf etish ustida hali ham ishlashmoqda va bunga yana bir kun talab etilishi mumkin.
