17:00 / 10.02.2019
19514
Samarqand tibbiyot institutiga pora evaziga o‘qishga kiritmoqchi bo‘lgan uyushgan jinoiy guruh a'zolariga hukm o‘qildi

Jinoyat ishlari bo‘yicha Samarqand shahar sudida sudya F.Samatov raisligida bir guruh shaxslarning o‘zaro jinoiy til biriktirib, firibgarlik (ya'ni aldash yoki ishonchni suiiste'mol qilish yo‘li bilan o‘zganing juda ko‘p miqdordagi mulkini qo‘lga kiritish va mansabdor shaxsga pora berishga qiziqtirish maqsadida qo‘l urilgan jinoyat ishiga hukm o‘qildi. Bu haqda Kun.uz muxbiri Samarqanddan xabar bermoqda.

Sudlanuvchilar — K.Sh. (muqaddam sudlangan), F.M., B.M. (muqaddam sudlangan) va B.Q. 2018 yilning 23 iyul kuni fuqaro O.G‘afurovning jiyani V.Solodovchenkoni Samarqand tibbiyot institutiga o‘qishga kiritishga amaliy yordam qilishlarini aytib, shu institutda ishlovchi mansabdor shaxslar bilan gaplashib, o‘qishga kirgizib berishni va'da qilib, O.G‘afurovdan 14.000 AQSh dollari so‘rashadi.

Bu jinoiy rejaga ko‘ra, K.Sh. tibbiyot institutida test sinovlaridan o‘tkazib bera oladigan tanishi borligini aytadi, F.M. esa o‘zini shu institutda ishlovchi dekan sifatida tanishtiradi, B.M. va B.Q. ham voqeaning bevosita ishtirokchilari sifatida harakat qilishadi.

Biroq ularning rejasi ish bermaydi va Samarqand shahridagi restoranlandan birida 14.000 AQSh dollarini sanab olayotgan chog‘da huquqni muhofaza qiluvchi organlar tomonidan ashyoviy dalil bilan jinoyat ustida qo‘lga olinadi.

Sud majlisida sudlanuvchilar olingan pullarni aniq biror mansabdor va amaldor shaxsga berib, abituriyentni o‘qishga kiritish masalani hal qilish emas, K.Sh.ga pul kerak bo‘lgani uchun O.G‘afurovni aldab, pul ishlab olmoqchi bo‘lganini ta'kidlashgan.

Sud sudlanuvchilar — K.Sh., F.M., B.M. va B.Q.ni O‘zbekiston Respublikasi Jinoyat kodeksining 25-, 168-moddasi 4-qismi «a» bandi va 28-, 211-moddasi 3-qismi «a» bandida nazarda tutilgan jinoyatlarni sodir etganlikda aybli deb topdi.

K.Sh.ga nisbatan eng kam oylik ish haqining 100 barobari miqdorida jarima jazosi va 7,5 yil muddatga ozodlikdan mahum qilish jazosi, F.M.ga nisbatan eng kam oylik ish haqining 50 baravari miqdorida jarima jazosi va 5 yil muddatga ozodlikdan mahum qilish jazosi, M.B. va B.Q.ga nisbatan eng kam oylik ish haqining 70 baravari jarima jazosi va 5,5 yil muddatga ozodlikdan mahrum qilish jazosi tayinlandi.

Top