Toshkent shahrida IIBB YHXB yo‘l-patrul xizmati inspektorlarining yangi formasi sinov qilinmoqda. Bu haqda Toshkent IIBB matbuot xizmati ma'lum qilgan.
«YHXB yo‘l-patrul xizmatining ikki inspektori chindan ham yangi formada xizmatni o‘tamoqda. Tajriba davomida xizmat kiyimining chidamliligi, kiyganda va harakatlanishda qulayligi tekshirilmoqda», — deyiladi IIBB xabarida.
Xabarda qayd etilishicha, fuqarolar fikrini inobatga olish ham ko‘zda tutilgan bo‘lib, boshqarma aholiga «Yo‘llardagi huquq-tartibot xodimlari shunday ko‘rinishda bo‘lishini istaysizmi?» degan savol bilan murojaat etgan.
Eslatib o‘tamiz, joriy yilning yanvar oyida Toshkent shahar IIBB boshlig‘i Rustam Jo‘rayev yaqin oylar ichida ichki ishlar tizimi xodimlari uchun yangi formalar jamoatchilikka taqdim etilishi to‘g‘risida ma'lum qilgandi.
