22:20 / 26.03.2019
8981
Ford Rossiyani tark etish haqida o‘ylamoqda
Foto: Mixail Voskresenskiy / RIA Novosti

Amerikaning Ford avtokonserni Rossiya bozorini tark etish haqida o‘ylamoqda. Bu haqda o‘z manbasiga tayanib «Kommersant'» xabar berdi.

Hozirda Rossiya hududida kompaniyaning uchta zavodi faoliyat olib bormoqda. Ular Vsevolojsk, Naberejniye Chelni va Yelabugadagi zavodlardir. Ford ikkita zavoddagi ulushlarini sotib, faqatgina Yelabugadagi loyihada o‘z ulushini saqlab qolish hamda Rossiyaga avtomobil importidan voz kechishni maqsad qilgan.

Rossiya bozoridan ketish haqidagi qaror kompaniyaning norentabel bozorlardagi faoliyatini butkul qayta ko‘rib chiqish dasturi bilan bog‘liq. Dilerlik tarmoqlari orasida o‘tkazilgan so‘rovga ko‘ra, o‘tgan yilning iyun-iyulida Ford yengil avtomobillariga birorta ham buyurtma bo‘lmagan.

Nashr manbalarining qayd etishlaricha, dastlabki ikki zavod uchun xaridor topilmasa, ular yopiladi. Yelabugadagi zavod esa kichik tonnajli avtomobillar ishlab chiqarishga moslashtiriladi, shuningdek, Ford Fiesta va Ford Kuga modellari ishlab chiqarilishi saqlab qolinishi mumkin.

Top