Malayziyaning sobiq bosh vaziri Najib Razzoq umumiy qiymati 1,5 mlrd ringgitga (367,9 mln dollar) teng soliqni to‘lamaganlikda gumon qilinmoqda. The Age nashrining ma'lum qilishicha, o‘tgan hafta soliq idoralari Razzoqqa 2011 yildan 2017 yilgacha davr uchun qo‘shimcha daromadlari haqida zudlik bilan hisobot berish talabi bilan maktub jo‘natgan.
Nashr ma'lumotlariga ko‘ra, Razzoq bu davr uchun soliqlarning bir qismini oshkor daromadlar asosida to‘lagan. Biroq soliq idoralari ma'lumotlariga ko‘ra, sobiq bosh vazir 4 mlrd ringgit (1 mlrd dollar) miqdoridagi pulni, jumladan Saudiya Arabistoni qirollik oilasidan olgan “moliyaviy yordam”ni deklaratsiya qilmagan.
Razzoqning partiyasi 2018 yil mayida parlament saylovlarida mag‘lubiyatga uchragan. Razzoq iste'foga ketgach unga nisbatan talon-tarojlik, pora olish, pullarni yuvish, xizmat mavqeini suiiste'mol qilish holatlari bo‘yicha jinoiy ishlar qo‘zg‘atilgan. Huquq-tartibot idoralarining fikricha, Razzoq 680 mln dollar miqdoridagi davlat mablag‘ini o‘g‘irlagan.
